Ըստ «Ժառանգության» վարչության նախագահ Արմեն Մարտիրոսյանի
Հուլիսի 10-ին կկայանա «ժառանգության» համագումարը, որը կարծես որոշիչ է լինելու այս կուսակցության դիմագծի տեսակետից` քաղաքական դաշտի աշնանային վերափոխումներից առաջ, այդ մասին պարբերաբար ԶԼՄ-ներով արտահայտվում են ե՛ւ «Ժառանգության» ղեկավարները, ե՛ւ վերլուծաբանները: Ի՞նչ փոփոխություններ են ակնկալվում հատկապես համագումարից` այս մեկ անգամ եւս ճշտող հարցեր ուղղենք կուսակցության վարչության նախագահ, ԱԺ պատգամավոր Արմեն Մարտիրոսյանին:
- Չկանխորոշելով համագումարի ընթացքն, այնուամենայնիվ, անձամբ ես նկատի եմ ունեցել փոփոխություններ, որոնք տեղի կունենան վարչությունում, ինչպես նաեւ կապված կուսակցության հետագա քայլերի հետ: Իդեոլոգիական փոփոխություն չի լինի, կուսակցության ծրագրից նոր վարչությունը չի շեղվի, իսկ հետագա քայլերի տակտիկան նոր վարչությունն ինքը կորոշի:
- Րաֆֆի Հովհաննիսյանի ասած ջրբաժանն ի վերջո ինչի՞ն էր վերաբերելու, չիմացանք.
- Ջրբաժանի բացատրությունը որեւէ մեկն ավելի լավ չի կարող տալ, քան Րաֆֆի Հովհաննիսյանը, ես, իհարկե, որոշակի ենթադրություններ ունեմ, թե ինչին կարող է ընդհանրապես վերաբերել ջրբաժանը` հիմնականում մարտավարության հետ կապված նախկին եւ ապագա քայլերին, ինչպես նաեւ վարչության ներսում կառուցվածքային որոշ բարեփոխում եմ հնարավոր համարում:
- Որոշելո՞ւ եք, թե ի վերջո ընդդիմության որ թեւի հետ եք աշխատելու. ընդհանրապես` հետեւո՞ւմ եք ՀՀՇ-ում հիմա ընթացող գործընթացներին:
- Նախ` ՀՀՇ-ում տեղի ունեցողը ներքին կուսակցական հարց է, եւ ես ընդամենը կարող եմ ասել, որ ե՛ւ Արարատ Զուրաբյանը, ե՛ւ Խաչատուր Քոքոբելյանը, համենայն դեպս ինձ համար, հարգարժան քաղաքական գործիչներ են եւ այդպիսիք մնում են: Ես չեմ կարծում, որ մամուլում ներկայացված այն տեղեկությունը, իբր իշխանական դաշտի ական են` իրականությանը համապատասխանում է, ես կարծում եմՙ մրցակցային խնդիր է` անձերի շուրջը, եւ տակտիկական խնդիրների շուրջն անհամաձայնություն, իսկ նմանատիպ ածականներ տալն ինձ համար ընդունելի չէ: Իսկ ինչ վերաբերում է նրան, թե ընդդիմության ո՞ր ուժի հետ մենք կհամագործակցենք, դա նոր վարչության որոշելիքը կլինի: Մենք բոլոր այն հարցերում, որոնց վերաբերյալ համաձայնություն կա ընդդիմության այլ թեւի ներկայացուցիչների հետ (եւ նպատակն ըստ էության նույնն է), համագործակցել ենք, եւ հետագայում էլ բոլոր այն հարցերում, որտեղ փոխադարձ համաձայնություն կլինի` մենք կհամագործակցենք:
- Խոսվում է, որ վարչության կազմն արմատապես կփոխվի, նրա նախագահը` Դուք նույնպես կփոխարինվեք, եւ որ` նոր մարդիկ (Ռուբեն Հակոբյան եւ այլք) հատուկ բերվել են` ղեկավար կազմում ընդգրկվելու համար, եւ ընդհանրապես` ակնարկվում է վարչությունում իշխանամետ դրսեւորումների մասին:
- Այսօրվա ղեկավարությունն ինչպիսի ուղեգիծ է դրսեւորել, կարծում եմ, հայտնի է բոլորին, այդ կեցվածքը բացառապես ընդդիմադիր է եղել, մնացածն ընդամենը առանց փաստարկների խոսակցության ոլորտից է: Կարծում եմ` ճիշտը քաղաքական քայլերը, գործողություններ դիտարկելն է, իսկ այդ դաշտում որեւէ մեկը «Ժառանգության» ներկայացուցիչներին որեւէ մեղադրանք չի կարող ներկայացնել: Թեւերի գոյությունն ի սկզբանե բացառում եմ («Ազգն» էր գրել «Ժառանգության» թեւերի մասին), «Ժառանգությունում» չկան թեւեր, կան կուսակցականներ, որոնք իրականացնում են կուսակցական կանոնադրությամբ նախատեսված պարտականությունները, եւ այն անձինք, որոնք կուսակցության կանոնադրությանը ոչ համապատասխան գործունեություն են իրականացնում` ընդամենը կուսակցական լինել չեն կարող: Բնականաբար նոր վարչությունը նոր դեմքերով է ներկայանալու, էական չէ` Արմեն Մարտիրոսյանն իր տեղը կպահպանի, թե ոչ, էականն այն է, թե հետագա իր գործունեության մեջ կլինի՞ նույն հետեւողականության ու սկզբունքների տերը, որ մինչ այդ էր, թե՞ ոչ:
- Րաֆֆի Հովհաննիսյանի տեղը ո՞րն է այժմ «Ժառանգությունում»:
- Րաֆֆի Հովհաննիսյանի տեղն անփոխարինելի է` կուսակցության առաջնորդն է, անկախ նրանիցՙ նա կլինի՞ վարչական պաշտոնում, թե ոչ, այս պահին միանշանակ կուսակցության առաջնորդն է:
- Հենց նա էր, սակայն, քննադատել կուսակցությունում դրվածքը եւ այլ շատ բան...
- Ու շատ լավ է, որ հենց նա է քննադատել, եւ կարծեք թե «Ժառանգությունը» հենց նրանով է առանձնանում մյուս կուսակցություններից, որ բացառապես թափանցիկ գործունեություն է իրականացնում, մենք չենք թաքցնում որոշակի դժգոհությունները, քննադատությունը, որը հարկավոր է ճիշտ աշխատելու համար:
- Հայտնի-հեղինակավոր մարդկանց պակաս չկա՞ ձեր կուսակցությունում, որոնք վարչության անդամ կդառնան, ու հասարակությունը նրանց կճանաչի:
- Դուք Արմեն Մարտիրոսյանին ճանաչո՞ւմ էիք մինչեւ խորհրդարան գալը...
- ՀԱԿ-ի առաջնորդին եւ ՀԱԿ-ականների հրավիրե՞լ եք այս համագումարին (անցած համագումարին Լեւոն Տեր-Պետրոսյանը բարձացավ ամբիոն, մի երկար ելույթ ունեցավ եւ իրենով արեց համագումարը` ոնց որ տունդ հյուր կանչես, ու դու հյուրի կարգավիճակում հայտնվես-Մ.Խ.):
- Այս պահին որեւէ որոշում չկա, թե ով է հրավիրվելու համագումարին, ով` չէ, վերջին շաբաթվա ընթացքում կպարզվի: Բայց նաեւ նշեմ, որ համագումարը բաց է լինելու եւ ցանկացած քաղաքացի, ով կցանկանա, կարող է մասնակցել:
- Վերջը` չեք ասում, ի՞նչ որակի անակնկալ սպասենք համագումարից...
- Ոչ թե անակնկալ, այլ այնպիսի որոշումներ կլինեն, որոնք մինչ այս չեն շրջանառվել, ուղղակի կարծում եմ` կլինի կարեւորագույն որոշումների ընդունման համագումար:
- Անցյալից դասեր քաղե՞լ եք, վերլուծելու եք անցյալը, հատկապես ո՞ր դասերն եք քաղել:
- Հատկապես ո՞ր դասերի մասին ենք խոսելու` համագումարի օրը կլսեք, իսկ ինչ վերաբերում է դասերին` ցանկացած խելամիտ անձ, այդ թվում` քաղաքական ուժ, նախկին փորձը անպայման որպես ուղեցույց իր հետագա գործունեության համար պետք է որ ընդունի:
- Բացառո՞ւմ եք, որ Րաֆֆի Հովհաննիսյանը հանկարծ ու հեռանա իր հիմնադրած «Ժառանգությունից» համագումարի ժամանակ:
- Բերեք բացառելու մասին չխոսենք, որովհետեւ կյանքում ոչինչ երբեք չի բացառվում, բայց քաղաքական տրամաբանությունն ինձ հուշում է, որ առավել ակտիվ կներգրավվի կուսակցական գործունեության մեջ:
ՄԱՐԻԵՏԱ ԽԱՉԱՏՐՅԱՆ