Սակայն օտարման գործարքների քանակի նվազում
ԱՐԱ ՄԱՐՏԻՐՈՍՅԱՆ
Անշարժ գույքի կադաստրի պետական կոմիտեիՙ շուկայի վերլուծության տվյալների համաձայն, 2010-ի մայիսին, Հայաստանի անշարժ գույքի շուկայում իրականացվել է 13517 գործարք, ինչը 12,6 տոկոսով ցածր է այս տարվա ապրիլի եւ 18,2 տոկոսով բարձրՙ 2009-ի մայիսի գործարքների համեմատ: Միայն օտարման գործարքների քանակը մայիսին ապրիլի համեմատ նվազել է 13,9 տոկոսով, իսկ անցյալ տարվա մայիսի համեմատ աճել 15,4 տոկոսով: 3339 օտարման գործարքներից առուվաճառքինը կազմել է 82 տոկոսը: Մնացածը նվիրատվություններն ու փոխանակություններն են: Անշարժ գույքի օտարման գործարքների քանակի 38,5 տոկոսն արձանագրվել է Երեւան քաղաքում:
Մայրաքաղաքում առուվաճառքի գործարքների 65,4 տոկոսն արձանագրվել է բազմաբնակարան շենքերի բնակարանների նկատմամբ: 2010-ի ապրիլի համեմատ, բնակարանների առուվաճառքի գործարքների քանակը Երեւանում մայիսին նվազել է 6,5 տոկոսով, իսկ նախորդ տարվա մայիսի համեմատՙ աճել 15,4 տոկոսով:
Բնակարանների շուկայական միջին գները Երեւանում այս տարվա մայիսին ապրիլի համեմատ, սակայն, աճել ենՙ 0,9 տոկոսով: Ըստ վարչական շրջանների, Երեւանում բնակարանների 1 քմ մակերեսի միջին շուկայական գները այսպիսին են եղել.
| Վարչական շրջաններ | Միջին գները (դրամ) մայիս 2009 թ. | Միջին գները (դրամ) մայիս 2010 թ. | Միջին գները (դրամ) ապրիլ 2010 թ. |
| Կենտրոն | 461300 | 469500 | 469200 |
| Արաբկիր | 354400 | 392200 | 389300 |
| Քանաքեռ-Զեյթուն | 274900 | 289700 | 288500 |
| Նոր Նորք | 225600 | 244700 | 243000 |
| Ավան | 221500 | 247900 | 242500 |
| Էրեբունի | 238900 | 252600 | 251400 |
| Շենգավիթ | 239000 | 262100 | 256900 |
| Դավթաշեն | 252600 | 280400 | 277200 |
| Աջափնյակ | 234900 | 242300 | 242300 |
| Մալաթիա-Սեբաստիա | 218700 | 251200 | 245500 |
| Նուբարաշեն | 134700 | 145900 | 144500 |
| Միջինը Երեւանում (բացի Նորք-Մարաշից) | 259700 | 279900 | 277300 |
Մարզերում, բացառությամբ Երեւանի, մայիսին վաճառվել են 276 բնակարաններ, որոնց քանակը ապրիլի համեմատ նվազել է 6,1 տոկոսով, իսկ 2009-ի մայիսի համեմատ աճել 23,2 տոկոսով: Բնակարանների միջին գները մայիսին ապրիլի համեմատ աճել են 0,8 տոկոսով:
Երեւանից հետո ամենաթանկ բնակարանները մայիսին եղել են Ծաղկաձորում, որտեղ 1 քմ մակերեսի շուկայական գինը կազմել է ավելի քան 181 հազար դրամ: Վաղարշապատում (Էջմիածնում)ՙ 165 հազար դրամ է կազմել, Աբովյանում 1 քմ գինըՙ 162 հազար հազար դրամ: Ապա գալիս են Աշտարակըՙ 142 հազար դրամ, Իջեւանըՙ 140 հազար դրամ, Գորիսըՙ 139 հազար դրամ, Մասիսըՙ 133 հազար դրամՙ 1 քմ դիմաց ցուցանիշներով:
2010-ի մայիսին Հայաստանում գրանցվել է անհատական տների առուվաճառքի 340 գործարք, որից 95-ըՙ Երեւանում: Մայրաքաղաքում անհատական տների առուվաճառքի գործարքների քանակը 2010-ի ապրիլի համեմատ նվազել է 39,9 տոկոսով, իսկ մարզերում նվազել 19,1 տոկոսով: 2009-ի մայիսի համեմատ անհատական բնակելի տների առուվաճառքի գործարքների քանակը Երեւանում աճել է 2,2 անգամ, իսկ մարզերում միասին վերցրածՙ 15 տոկոսով:
Միջինացվածՙ 250 քմ շինության մակերես եւ 400 քմ տնամերձ ունեցող անհատական տների 1 քմ-ի միջին գները (ներառյալ տնամերձի միավորի գինը) 2010-ի մայիսին ապրիլի համեմատ աճել են 1 տոկոսով: Ըստ Երեւանի վարչական շրջաններիՙ գներն այսպիսին են եղել.
| Վարչական շրջաններ | Միջին գները (դրամ) մայիս 2009 թ. | Միջին գները (դրամ) մայիս 2010 թ. | Միջին գները (դրամ) ապրիլ 2010 թ. |
| Կենտրոն | 501200 | 487700 | 487200 |
| Արաբկիր | 396400 | 399200 | 393000 |
| Քանաքեռ- Զեյթուն | 308700 | 294700 | 293300 |
| Նորք-Մարաշ | 307700 | 287200 | 286200 |
| Ավան | 272100 | 251900 | 247700 |
| Էրեբունի | 281500 | 260300 | 259400 |
| Շենգավիթ | 271000 | 265900 | 259400 |
| Դավթաշեն | 297900 | 286100 | 283400 |
| Աջափնյակ | 274300 | 249400 | 249000 |
| Մալաթիա-Սեբաստիա | 260300 | 253200 | 246800 |
| Նուբարաշեն | 155300 | 148400 | 148100 |
| Միջինը Երեւանում (բացի Նոր Նորքից) | 302400 | 289500 | 286700 |
Մարզերում միջինացված են 200 քմ շինության եւ 1000 քմ տնամերձ մակերեսով անհատական տների գները: Այստեղ միջին գները մայիսին ապրիլի համեմատ նույնպես աճել ենՙ 1 տոկոսով, իսկ ամենաթանկ անհատական տները դարձյալ Ծաղկաձորում ենՙ 1 քմ-ն 312 հազար դրամ: Այս ցուցանիշով Ծաղկաձորը զիջում է միայն Երեւանի Կենտրոն եւ Արաբկիր շրջաններին: Երկրորդը Աբովյանն է. 1 քմ-նՙ 173 հազար դրամ, երրորդը Վաղարշապատն է, որտեղ 1 քմ-ն կազմել է 170 հազար դրամ: Ապա գալիս են Աշտարակըՙ 150 հազար դրամ, Գորիսըՙ 145 հազար դրամ, Իջեւանըՙ 144 հազար դրամ, Նոր Հաճընըՙ 136 հազար դրամ, Եղվարդըՙ 128 հազար դրամ 1 քմ դիմաց:
Հողի շուկայում հետեւյալ պատկերն էՙ 2010-ի մայիսին 2009-ի մայիսի համեմատ, հողերի առուվաճառքի գործարքների քանակն աճել է 19,6 տոկոսով, աճուրդով վաճառվող հողերինըՙ 26,9 տոկոսով:
2010-ի մայիսին ապրիլի համեմատ անշարժ գույքի վարձակալության գործարքների քանակն նվազել է 3,1 տոկոսով, իսկ 2009-ի մայիսի համեմատ նվազել 30,3 տոկոսով:
Մայիսին իրականացվել են հիպոթեկային գրավադրման 154 գործարքներ, որից 115-ը` Երեւանում: Հիպոթեկային գրավադրման գործարքներից 84,4 տոկոսն իրականացվել է բազմաբնակարան բնակելի շենքերի բնակարանների, 12,3 տոկոսը` անհատական բնակելի տների, մնացածը հասարակական նշանակության օբյեկտների, այգետնակների եւ հողերի նկատմամբ: 2010-ի ապրիլի համեմատ, հիպոթեկային գրավադրման գործարքների քանակը նվազել է 17,2 տոկոսով, ընդ որում Երեւանում` 18,4 տոկոսով, իսկ մարզերում` 13,3 տոկոսով: 2009-ի մայիսի համեմատ, հիպոթեկային գրավադրման գործարքների քանակն աճել է 2,7 անգամ, ընդ որում, Երեւանում` 3,4 անգամ, մարզերում` 69,6 տոկոսով:
Այսպիսով, 2010-ի մայիսին շարունակվել է անշարժ գույքի գների փոքր աճի մոտ 1 տարի առաջ սկսված միտումը: Սակայն արդեն երկրորդ ամիսն է, ինչ գործարքների, այդ թվումՙ առուվաճառքի, նվազում է արձանագրվում: Հավանական է, որ շուկայի պասիվացման այդ միտումը պահպանվի նաեւ ամռան ամիսներին, իսկ աշնանը վերստին աշխուժացում սկսվի: