2010 թ. օգոստոս 26-ին`որբեւայրիների եւ աղքատների գթության քույր Մայր Թերեզայի տարեդարձի օրը, Կալկաթայում մեկնարկեց նրա ծննդյան 100-ամյակին նվիրված տոնախմբությունը:
Կաթոլիկ մի քանի կազմակերպություններ ՅՈՒՆԵՍԿՕ-ի հետ համատեղ, Կալկաթայի արքեպիսկոպոս Լուկաս Սարքարի նախագահությամբ, կազմակերպել են Մայր Թերեզայի անվան երրորդ միջազգային կինոփառատոնը, որը կտեւի օգոստոս 26-29: Կինոփառատոնը միաժամանակ կանցկացվի նաեւ 17 երկրներում, այդ թվում` Վատիկանում, Ճապոնիայում, Հոնկոնգում, Թաիլանդում...
Տոնախմբության հանդիսավոր բացմանը Հայ առաքելական եկեղեցին ներկայացրեց հնդկահայոց հոգեւոր հովիվ, Հայոց մարդասիրական ճեմարանի կառավարիչ Խորեն աբղ. Հովհաննիսյանը, ով հատուկ հրավիրված էր կաթոլիկ արքեպիսկոպոսի կողմից:
Բացման արարողությունից հետո ցուցադրվեց «Մայր Թերեզա» ֆիլմը: Փառատոնի ընթացքում կցուցադրվի եւս 15 ֆիլմՙ բոլորն էլ նվիրված Գթության մորը:
Օգոստոսի 29-ից հետո փառատոնը Կալկաթայից կտեղափոխվի Հնդկաստանի տարբեր քաղաքներ:
Գթության քույրն ապրել է Կալկաթայում, հիմնադրել Գթության միաբանությունը, որը նրա մահից հետո էլ շարունակում է իր մարդասիրական առաքելությունը:
1988 թ.-ի երկրաշարժից հետո նա եկավ Հայաստանՙ մխիթարելու եւ աջակցելու տուժածներին:
Կալկաթայում գտնվող Մայր Թերեզայի տուն-թանգարանը, ուր ամփոփված է նրա աճյունը, ուխտատեղի է դարձել տեղացիների եւ այցելուների համար: