ՀՀ սփյուռքի նախարարության նախաձեռնությամբ, Լրատվամիջոցների համահայկական ընկերակցության եւ Հայաստանի Ժուռնալիստների միության մասնակցությամբ 2010 թ. հոկտեմբերի 12-16-ը Արցախում կազմակերպվելու է «21-րդ դարի մարտահրավերները. տեղեկատվական անվտանգությունը եւ հայ լրատվությունը» թեմայով լրագրողների համահայկական 5-րդ համաժողովը, որին մասնակցելու են Հայաստանի եւ Սփյուռքի լրատվամիջոցների ներկայացուցիչներ, օտար ԶԼՄ-ում աշխատող հայ լրագրողներ եւ լրատվամիջոցների ղեկավարներ:
Մինչեւ սեպտեմբերի 15-ը համաժողովին իրենց մասնակցությունը հաստատել են 100 լրատվամիջոցի ներկայացուցիչ: Մոտ երկու տասնյակ լրատվամիջոցներ ցանկություն են հայտնել համաժողովին մասնակցել ինտերնետ կապի միջոցով:
Այժմ համաժողովի մասնակիցներն ուղարկում են իրենց աշխատանքային կենսագրությունը, զեկույցները, լուսանկար եւ համառոտ տեղեկատվություն իրենց լրատվամիջոցի վերաբերյալ, որոնք անմիջապես տեղադրվում են mediaforum.am կայքի 5-րդ համաժողով բաժնում:
Նախնական պայմանավորվածություն է ձեռք բերվել Արցախի 6 հյուրանոցի հետ համաժողովի մասնակիցներին տեղավորելու համար: Նախապատրաստական մյուս աշխատանքները եւս ընթացքի մեջ են: