«ԱԶԳ» ՕՐԱԹԵՐԹ

https://www.azg.am | WAP | WAP-CULTURE

#201, 2010-11-03 | #202, 2010-11-04 | #203, 2010-11-05


ՍԵՐԲԻԱՆ ՆԵՐՈՂՈՒԹՅՈՒՆ ԽՆԴՐԵՑ ԽՈՐՎԱԹԻԱՅԻՑ

Սերբիայի նախագահ Բորիս Տադիչը ժամանել է Խորվաթիա: Հաշվի առնելով նախկին Հարավսլավիայի մաս կազմող երկու երկրների միջեւ ընթացած պատերազմը` Սերբիայի նախագահի այցը Զագրեբ ինքնին նշանակալի իրադարձություն է, որը արդեն գնահատվում է որպես Եվրոմիությանը անդամակցել ձգտող երկու պետությունների հաշտեցման խորհրդանշական քայլ: Տադիչը Խորվաթիայում պաշտոնապես ներողություն է խնդրել` Վուկովարում խորվաթների ջարդի համար, որը համարվում է խորվաթական պատերազմի ընթացքում սերբերի ամենադաժան գործողությունը: Սերբիայի նախագահը այցելել է Խորվաթիայի արեւելքում գտնվող Վուկովար քաղաքի մերձակա Օվչարա վայրը, որտեղ ամփոփված են 1991-ին 260 խորվաթների աճյունները` սպանված հարավսլավական բանակից հովանավորվող սերբ ապստամբների կողմից: «Ես այստեղ եմ հարգանքի տուրք մատուցելու զոհերի հիշատակին: Ես եւս մեկ անգամ ներողություն եմ խնդրում», Օվչարայի հուշահամալիրում ասել է Տադիչը:

Նույն օրը Սերբիայի նախագահը եւ իր խորվաթ գործընկեր Իվո Յոսիպովիչը եղել են Պաուլին Դվոր գյուղում, որտեղ 1991-ին խորվաթները սպանել են 19 քաղաքացիական անձի, որոնցից 18-ը` սերբ:

Հ. Ա.


© AZG Daily & MV, 2009, 2011, 2012, 2013 ver. 1.4