Փարիզի «Սիժեստ» (Sigest) հրատարակչությունը տարիների աշխատանքային փորձ ունիՙ ֆրանսերեն եւ հայերեն շուրջ 40 գրքերի լույսընծայմամբ: Տնօրենըՙ Վարուժան Սիրապյանը, վերջին տարիներին հայաստանյան հրատարակչությունների հետ համագործակցությունը աստիճանաբար սերտացնում է: «Արեգ» հրատարակչության «Հայաստանի հրաշալիքները» ֆրանսերենով հանրագիտարանի եւ ֆրանսերեն-հայերեն, հայերեն-ֆրանսերեն զրուցարան-բառարանի փարիզյան տպագրությունները բավականին հաջողություն ունեցան: Այդ համագործակցության արդյունքում շուտով լույս կտեսնի Էրոլ Օզքորայի «Թուրքիա. մշտատեւ զինվորական հեղաշրջում» գիրքըՙ Պետրոս Քեշիշյանի հայերեն թարգմանությամբ եւ ֆրանսերեն թարգմանությամբ Փարիզում լույս կտեսնի Հովհաննես Թումանյանի բալլադների, պոեմների եւ հեքիաթների պատկերազարդ ընտրանին, որ կներկայացվի Ժնեւում կայանալիք միջազգային տոնավաճառում:
«Սիժեստ»-ի վերջին թողարկումըՙ «Երեւանյան դիմանկարներ» ֆրանսերեն գրքույկը քաղաքի բնակիչների միջոցով Երեւանը ներկայացնելու փորձ էՙ առօրեական եւ աշխատանքային պատմություններ, լուսանկարների ուղեկցությամբ: Գրքի շնորհանդեսը «Արտբրիջում» կայացավ որպես զրույց երեւանյան լավագույն մտավորական մի շրջանակի հետ: Եղան առաջարկներ ապագա հրատարակչական ծրագրերի շուրջ: «Սիժեստ»-ին հանգամանալի անդրադարձՙ ավելի ուշ:
Մ. Բ.