Երեւանի պետական համալսարանում երեկ տեղի է ունեցել խորհրդի նիստ, որը վարել է ԵՊՀ խորհրդի նախագահ, ՀՀ նախագահ Սերժ Սարգսյանը: Նիստի օրակարգում ընդգրկված էր համալսարանի ռեկտորի ընտրության հարցը: Գաղտնի քվեարկությամբ ռեկտորի պաշտոնակատար Արամ Սիմոնյանն ընտրվել է ԵՊՀ ռեկտոր: Խորհրդի 60 անդամ կողմ է քվեարկել նրա թեկնածությանը, իսկ դեմ քվեարկողները եղել են 7 հոգի: 2 քվեաթերթիկ համարվել է անվավեր: Արամ Սիմոնյանն ընտրվել է 5 տարի ժամկետով: Ի դեպ, ռեկտորի թափուր պաշտոնի համար հայտարարված մրցույթում առաջադրված միակ թեկնածուն Արամ Սիմոնյանն էր:
ՀՀ նախագահի մամլո գրասենյակից տեղեկացանք, որ հանրապետության նախագահը շնորհավորել է նորընտիր ռեկտորին` վստահություն հայտնելով, որ առաջիկա 5 տարիներին մայր բուհն ունենալու է լուրջ ձեռքբերումներ: «Բոլորիս ակնկալիքը շատ մեծ է: Մենք ուզում ենք տեսնել բարձրակարգ պետական համալսարան: Սա՛ է մեր ցանկությունը, եւ ես իմ կողմից, կառավարությունն իր կողմիցՙ վստահ ենք, որ խորհրդի բոլոր անդամներն անելու են ամեն ինչ, որպեսզի մենք հասնենք այս նպատակին», ասել է Սերժ Սարգսյանը:
Ի. Պ.