Լոնդոնից արձակագիր Ասատուր Կյուզելյանի հետ «Տեսակետ» ակումբում երեկ կայացած հանդիպման «մեղավորը» գրողի վերջին «Թերթելով մամուլը» գիրքն էր:
Այն ներկայացնում է Կյուզելյանի կեսդարյա լրագրողական նոթերը, թղթակցություններն ու հարցազրույցները:
Հետագայում արձակագիրը նախատեսում է հրատարակել հայոց մեծերի` Պարույր Սեւակի, Հովհաննես Շիրազի, Արամ Խաչատրյանի հետ ունեցած նամակագրությունները: «Նախատեսում եմ տպագրել նաեւ իմ հուշերը», ասում է Կյուզելյանն ու հավելում, որ միայն Վազգեն կաթողիկոսի մասին 300 էջանոց հուշեր ունի:
Սփյուռքահայ մտավորականը ցավով է փաստում, որ խորհրդային տարիների համեմատությամբ` այսօր մեծ ու տաղանդավոր գրողներ չկան: Կյուզելյանը վստահ է. պատճառը տնտեսական վատ վիճակն է: «Մարդ գիշերն իր ընտանեկան հոգսի մասի՞ն մտածե, թե լուրջ կերպով գրականության հետեւի: Երբ մեկուն միտքը մտահոգ է, ան կրնար ստեղծագործել»:
Որպեսզի արժեքավոր գրական գործեր ստեղծվեն անհրաժեշտ են ներշնչող-ուղղորդող մարդիկ, ովքեր նույնպես չկան: Իսկ արվեստ առանց ներշչող, օգնող մարդկանց չի ստեղծվում:
«Ստեղծենք համահայկական կենտրոնական մեծ ուժ, ուր բոլորը կնստին մեկ սեղանի շուրջ եւ վիճելի հարցերը կզանազանեն անվիճելիներեն: Համախմբվինք անվիճելի հարցերու շուրջ: Անկախ Հայաստան ունինք, մտածենք, որպես պետականություն ունեցող ժողովրդի զավակ», խորհուրդ է տալիս Կյուզելյանը:
«Դուք սփյուռքում մատ եք մնացել, մինչեւ չբռունցքվեք, տեղ չեք հասնի»,- Ասիկ Շիրազի խոսքերն են` ուղղված ինձի: Այսօր Շիրազի այդ պատգամը ես ձեզի կուտամ», ասում է մտավորականը:
Հ. Հ.