Մայր աթոռ Սուրբ Էջմիածնում Գարեգին Բ Ամենայն հայոց կաթողիկոսի նախագահությամբ երեկ տեղի է ունեցել Հայաստանի եւ Արցախի թեմակալ առաջնորդների ժողովը: Մայր աթոռից ստացված հաղորդագրությունը տեղեկացնում է, որ ժողովին քննության են առնվել եկեղեցու առջեւ ծառացած ժամանակակից մարտահրավերները, թեմական կյանքին առնչվող վարչական, կարգապահական խնդիրները, եկեղեցական պատմական կառույցների նկատմամբ հոգատար վերաբերմունք ցուցաբերելու հարցը: Քննարկմանը ժողովականները անդրադարձել են թեմերում եկեղեցականների հովվական ծառայությանը: Հոգեւոր հովիվները պետք է առավել ուշադրություն դարձնեն քարոզչական գործունեությանը, հովիվ-համայնք, հովիվ-ընտանիք հարաբերությունների սերտացմանը:
Մտահոգություն հայտնելով կրոնական տարբեր կազմակերպությունների եւ աղանդավորական հոսանքների քայքայիչ գործունեությունիցՙ ժողովականները ընդգծել են տուժած ընտանիքների եւ անհատների հետ առավել ակտիվ աշխատելու անհրաժեշտությունը: Կարեւորվել է հոգեւոր հովիվների բնակությունն իրենց խնամքին հանձնված համայնքներում:
Վերջին շրջանում հասարակական աղմուկ բարձրացրած մի շարք ինքնասպանություններ կապվում են աղանդավորական տարբեր կազմակերպությունների քայքայիչ գործունեության հետ:
Օրերս Դիլիջանում հայտնաբերել էին ընտանիքի մոր` պարանից կախված դին եւ նրա` երակները կտրած 23 եւ 25-ամյա զավակներին (երեխաների կյանքը հաջողվել էր փրկել-Հ.Հ.):
Ինքնասպանությունը կատարվել էր կրոնական հողի վրա, որովհետեւ իրավապահները տանը գտել էին Հիսուսի` գետնին նետված եւ պատռած նկարները: Մի քանի շաբաթ առաջ հասարակությանը ցնցեց Արարատի դեպքը, երբ մայրը երկու երեխաներին խեղդել էր: Անցյալ տարի Սեւանում 23-ամյա երիտասարդը սպանել էր ծնողներին` հայտարարելով, որ ինքը «աստծո զավակն է»:
Իրավապահ մարմինների գնահատմամբՙ դրանք նույնպես կրոնական հիմքով սպանություններ էին, որովհետեւ տուժածների բնակարանում գտել էին աղանադավորական գրականություն:
Բաբկեն քահանա Հայրապետյանը վստահ է` ինքնասպանության դրդում են այն աղանդները, որոնց դավանաբանության մեջ նշվում է, որ մահանում է ոչ միայն մարմինը, այլեւ հոգին, մինչդեռ Հայ առաքելական եկեղեցին ասում է, որ հոգին անմահ է եւ ինքնսպանությունը մեղք է համարում:
«Միայն ինքնասպանություն գործողը մեղավոր չէ, մեղքի բաժին ունեն նրա ընտանիքի անդամները, շրջապատը, բոլորս: Մեր ամենամեծ մեղքը մեր անտարբերությունն է»: Քահանան համոզված է` ինքնասպանությունները կրոնական են: Քահանայի գնահատմամբ` աղանդը դանդաղ գործող թույն է, որի դեմ պետք է պայքարել: Քահանային զարմացնում է երիտասարդական էմո շարժման գաղափարախոսությունը` «Դու ի՞նչ էմո ես, եթե գոնե մեկ անգամ ինքնասպանության փորձ չես արել»:
«Ինձ մոտ եկեղեցի էր եկել մի երիտասարդ այդ խմբավորումից, ում գանգը դաջված էր հրեշների պատկերներով: Նա զղջում էր, որ նման բան է արել»: Քահանան համոզված է, եթե տղան չգար եկեղեցի, ապա ինքնասպանություն կգործեր:
Հ. Հ.