Միացյալ Նահանգների Ազգային հետախուզության տնօրեն Ջեյմս Քլափփերը , կոնգրեսականներին ներկայացնելով համաշխարհային սպառնալիքների ու վտանգների առնչությամբ գնահատականների զեկույցը, անդրադարձել է նաեւ ղարաբաղյան խնդրին:
Գլոբալ մարտահրավերների բաժնում ներկայացնելով Կենտրոնական Ասիան եւ Կովկասը` Քլափփերը նշել է, որ իրենց գնահատմամբ եվրասիական տարածքում հնարավոր թեժ կետեր կարող են դառնալ կովկասյան հակամարտություններն ու որոշ երկրներ Կենտրոնական Ասիայում: «Լեռնային Ղարաբաղի տարածաշրջանը եւս մեկ ներուժային թեժ կետ է», ասվում է զեկույցում, հավելմամբ, որ «Հռետորաբանության ուժգնացումը, կողմերի միջեւ անվստահությունը եւ կրկնվող բռնությունները շփման գծի երկայնքով մեծացնում են սխալ հաշվարկների ռիսկը, ինչը կարող է առավել լարել իրավիճակը` թեթեւակի զգուշացումներով»:
Հետաքրքրական է, որ Արցախի առնչությամբ առանձնակի շեշտումն արվում է Վրաստանի «անջատողական տարածաշրջաններ Հարավային Օսիայի եւ Աբխազիայի» առնչությամբ ռուս-վրացական լարվածության գնահատումներից հետո: Զեկույցը նշում է վրացական կողմի` Վրաստանը ռմբակոծելու առնչությամբ Ռուսաստանին ուղղված մեղադրանքները, դրանց կողքին հիշեցնելով նաեւ ռուսաստանյան կողմի մեղադրանքները Վրաստանին` Հյուսիսային Կովկասի էթնիկ խմբերի հետ ներգրավվածության առումով:
Ընդ որում, ԱՄՆ Ազգային հետախուզության մակարդակով դատողություններ են արվում, թե ներկայումս Վրաստանում վարչապետի պաշտոնի լիազորությունների ուժեղացումը 2013-ի նախագահական ընտրություններից առաջ կարող է բերել ակնկալիքների, թե նախագահ «Սաակաշվիլին կցանկանար մնալ իշխանության գլուխ որպես վարչապետ, ինչն էլ կարող է ազդել լարվածության նվազեցման հեռանկարի վրա»:
Ա. ՀԱՐՈՒԹՅՈՒՆՅԱՆ