«ԱԶԳ» ՕՐԱԹԵՐԹ

https://www.azg.am | WAP | WAP-CULTURE

#40, 2012-03-03 | #41, 2012-03-06 | #42, 2012-03-07


ՀԱՅԱՍՏԱՆԻ ՆԱԽԱԳԱՀԸ ԲՐՅՈՒՍԵԼՈՒՄ ՀԻՇԵՑՐԵԼ Է ԱԼԻԵՎԻ ՌԱՍԻՍՏԱԿԱՆ ՀԱՅՏԱՐԱՐՈՒԹՅՈՒՆՆԵՐԸ

«Ադրբեջանը կտրականապես մերժում է վստահության կառուցման յուրաքանչյուր առաջարկՙ ուղղված թե՛ տարածաշրջանային համագործակցության խթանմանը, թե՛ շփման գծում լարվածության թուլացմանը», Բրյուսելում ՆԱՏՕ-ի գլխավոր քարտուղար Անդերս Ֆոգ Ռասմուսենի հետ հանդիպման ավարտին հայտարարել է աշխատանքային այցով Բելգիայում գտնվող Հայաստանի նախագահ Սերժ Սարգսյանը :

Ռասմուսենի հետ Սարգսյանը, ըստ պաշտոնական հաղորդագրության, ի թիվս այլ հարցերի, քննարկել է նաեւ ղարաբաղյան հակամարտության կարգավորման բանակցային գործընթացի վերջին զարգացումները: «Ադրբեջանը, ցավոք, դեմ է դիպուկահարների հետքաշմանը առաջին գծից, դեմ է միջադեպերի հետաքննությանը», ասել է Սարգսյանը, նշելով, որ ոչ մի րոպե չեն դադարել Ադրբեջանի կողմից պատերազմի կոչերը: Հայաստանի նախագահի խոսքերովՙ «Ադրբեջանի ղեկավարությունը շարունակում է հայերի նկատմամբ ատելության սերմանումը»:

Սարգսյանը հիշեցրել է, որ Ադրբեջանի նախագահը ընդամենը մի քանի օր առաջ հայտարարեց, որ ադրբեջանցիների թիվ մեկ թշնամին աշխարհասփյուռ հայությունն է: «Այս հանգամանքը պետք է արժանանա միջազգային հանրության գնահատականին»:

«Գլխավոր քարտուղարի հետ համամիտ էինք, որ հակամարտությունը պետք է կարգավորվի բացառապես խաղաղ միջոցներով եւ բանակցությունների ճանապարհովՙ ԵԱՀԿ Մինսկի խմբի շրջանակներում: Համոզված ենք, որ ԼՂ հակամարտության վերջնական կարգավորումը հնարավոր է միայն ժողովուրդների ինքնորոշման իրավունքի հարգման եւ անվտանգության համակողմանի երաշխիքների ապահովման միջոցով», եզրափակել է Հայաստանի նախագահը:

Ա. Հ.


© AZG Daily & MV, 2009, 2011, 2012, 2013 ver. 1.4