Իշխանությունները մեղադրում են ընդդիմությանը
Մայիսի 10-ին Սիրիայի մայրաքաղաք Դամասկոսի հարավ-արեւմուտքումՙ ալ-Կազզազի շրջանում որոտացել է երկու հուժկու պայթյուն: Երկրի պետական հեռուստատեսության նախնական տվյալները վկայակոչելովՙ Ֆրանսպրեսը հաղորդում է առնվազն 40 սպանվածների եւ 170 վիրավորների մասին:
Հատուկ ծառայությունների շենքերի մոտ պայթեցվել են ականված ավտոմեքենաներ: BBC-ն հաղորդում է, որ պայթյուններից ավերվել են հատուկ ծառայությունների երկու հիմնական շենքերը:
Սիրիայի հեռուստատեսությունը ցուցադրել է պայթյուններից ծռմռված բազմաթիվ ավտոմեքենաներ եւ մարդկանց այրված դիակներ:
Պայթյունները տեղի են ունեցել վաղ առավոտյան, երբ ծառայողները գնում էին աշխատանքի, երեխաներըՙ դպրոց:
«Ալ Մանար» հեռուստաալիքը նշում է, որ սաստիկ պայթյունների ցնցումները զգացվել են ամբողջ քաղաքում: Ահաբեկչություններից դժգոհ բնակիչները երեկ Դամասկոսի հրապարակներից մեկում կազմակերպել են հանրահավաք, որի ընթացքում իշխանություններից պահանջել են ահաբեկիչներից պաշտպանել խաղաղ բնակիչներին:
Նախօրեին Սիրիայում երկու ռումբ էր պայթեցվել դեպի Դերաա քաղաք շարժվող ՄԱԿ-ի դիտորդների եւ լրագրողների շարասյան ճանապարհին:
Երեկվա ահաբեկչությունների համար որեւէ խմբավորում պատասխանատվություն չի ստանձնել: Իշխանությունները մեղադրում են ընդդիմության հետ կապված զինյալներին: Երեկվա պայթյունները Դամասկոսում ամենից արյունալի ահաբեկչությունն են վերջին տարիներին:
Մայիսի 6-ին քաղաքում պայթյունից վիրավորվել էր երեք զինվոր: Ապրիլի վերջերին քաղաքի մզկիթներից մեկի մոտ մահապարտ ահաբեկիչը իրեն պայթեցնելովՙ սպանել էր 10 մարդու: Այդ ահաբեկչությունների պատասխանատվությունը ստանձնել էին տեղացի արմատական իսլամիստները: