«Ազգի» խմբագրությունը շնորհակալությամբ ստացել է Պարույր Աղպաշյանի «Մամլոյ յօդուածներ» արաբերեն գիրքը եւ Հայկազյան համալսարանի հրավերը ներկա գտնվելու այդ գրքի շնորհանդեսին, որը տեղի է ունենալու մայիսի 18-ին, Բեյրութի Հայկազյան համալսարանի հանդիսասրահում:
«Համազգային» հրատարակչատան թողարկած, 128 էջ պարունակող բարձրորակ հատորը ներառում է «Զարթօնք» օրաթերթի գլխավոր խմբագրի պաշտոնը զբաղեցրած (1990-2007) հեղինակիՙ Պ. Աղպաշյանի այդ նույն օրաթերթում տպագրած 37 հոդվածների արաբերեն թարգմանությունները, վարպետորեն կատարված Նանոր Միքայելյան-Քեքլիկյանի կողմից:
Հոդվածներում քննարկվում են ինչպես Լիբանանի ներքին, արտաքին, այնպես էլ ընդհանուր առմամբ Միջին Արեւելքի եւ նաեւ հայկական համայնքի ու Հայաստան-Լիբանան հարաբերությունների խնդիրները:
Գրքի առաջաբանը գրել է լիբանանյան մամլո սինդիկատի նախագահ Մոհամմեդ Բաալբաքին, որը նաեւ պատվո հյուրն է վերոնշյալ միջոցառման: «Այս գիրքը» խորագրի ներքո հեղինակը հակիրճ ներկայացրել է գրքի ստեղծման հանգամանքները եւ շնորհակալություն է հայտնում բոլոր նրանց, ովքեր իրականություն են դարձրել հրատարակությունը:
Իր առաջաբանում պրն Բաալբաքին Աղպաշյանին բնութագրել է որպես «մշտարթուն աչքի», որն իր երիտասարդության ծաղկուն տարիներն ու ամբողջ ժամանակը նվիրել է լրագրությանը եւ իր հարազատ «Զարթօնք» օրաթերթին:
Գիրքը շնորհանդեսի ժամանակ պետք է ներկայացնի Հայկազյան համալսարանի դասախոսներից դոկտ. Ժան Սալմանյանը:
Հ. Ծ.