Իր տեսակի մեջ Մ. Նահանգներում առաջինը բետոնե այս ճեմուղին գտնվում է Սքոթսդեյլում (Արիզոնա), Սուրբ Աբգար Հայ առաքելական եկեղեցուն կից: Երկարությունը 20 մետր է, լայնությունըՙ 1,5 մետր: Եզերված է «Զոհվեցինք այս վայրերում հանուն մեր հավատի» բառերով, որոնք ուղեկցում են ճանապարհի երկայնքին դրոշմված այն 113 քաղաքների անուններին, որոնցում 1896-1915 թվերին իրականացվել են հայերի ցեղասպանական կոտորածները: Ծրագրման եւ ֆինանսավորման մի քանի փուլերից հետո ճեմուղին արդեն բացված է, դրա մտահղացման եւ ծրագրավորման հեղինակը 17 տարեկան Նուբար Արմեն Մանուկյանն է: Նրա նախագիծը հավանության է արժանացել «Գրանդ Քենյոն Քաունսըլ» խորհրդի կողմից, եւ նրան շնորհվել է «Արծիվ Սկաուտի» պատվավոր կոչումը, որն ընդամենը սկաուտներից հինգ տոկոսին է բաժին հասնում: Այդ առթիվ պաշտոնական արարողությունը տեղի է ունեցել ապրիլի 12-ին, տեղեկացնում է «Արմինյն միրոր-սփեքթեյթր» շաբաթաթերթի ապրիլի 21-ի համարը:
Հ. Ծ.