Այսօրՙ հոկտեմբերի 4-ին, երեկոյան ժամը 7-ին հանրահայտ ամերիկահայ գրող Փիթեր Բալաքյանը հյուրընկալվելու է Հեմպստեդում գործող հունական ուղղափառ Սբ Պողոս մայր տաճարումՙ հատվածներ կարդալու «Լոս Անջելես թայմսի» կողմից «1997 թվի լավագույն գրքերից մեկը» ճանաչված իր հայտնի «Ճակատագրի սեւ շունը» հատոր-հուշագրությունից, ինչպես նաեւ քննարկելու սերունդների վրա Հայոց ցեղասպանության թողած հետեւանքները:
Երեկոն բացելու է Հոֆստրա համալսարանի պրոֆեսորներից Թինա Մավրիկոս-Ամադուն, որը խոսելու է հայ-հունական կապերի եւ պատմական նմանությունների մասին:
Իսկ շաբաթ օրըՙ հոկտեմբերի 6-ին, նա հանդես է գալու Ուոլտ Ուիթմենի ծննդավայրումՙ Լոնգ Այլենդում գործող «Ուիթմենի բանաստեղծություններին համաքայլ» պոեզիայի ընթերցումների շարքի հերթական միջոցառմանը:
Ըստ «Արմինյն միրոր-սփեքթեյթր» շաբաթաթերթի տեղեկատվությանՙ ընթերցումների եւ քննարկումների ավարտին տեղի է ունենալու ընդունելություն:
Հ. Ծ.