Կատակ բան չէ 95 տարեկանում հայտարարել պաշտոնապես, որ նշանվում է: Ճանաչված գործարար եւ բարերար Քըրք Քըրքորյանը, որն անձնական կյանքը թաքուն է պահում եւ գրեթե մեկուսացված է ապրում հասարակությունից, սեպտեմբերի սկզբներին հաստատել է, որ իրոք նշանվում է երկարամյա իր ընկերուհիներից Լու Բիըրդի հետ, որի 31 տարվա ամուսինը, նավթարդյունաբերության մագնատ Բիլ Բիըրդը, մահացել էր մի տարի առաջ:
Լուրը էլ. փոստով «Review-Journal»-ի բիզնեսի բաժնի հոդվածագիր Հովարդ Ստուտցին էր ուղարկել Քըրքորյանի հիմնարկության խոսնակ Թոմ Ջոնսոնը, ավելացնելով, որ «MGM Resorts»-ի հիմնադիրը իր ընկերների հետ ընթրելու ժամանակ է կատարել հայտարարությունը:
Այս լուրը վերջ է դնում այն ասեկոսեներին, թե Քըրքորյանը դեռեւս նշանված է 60-ամյա Ջոան Դեյնջրֆիլդիՙ կատակերգության լեգենդար հերոս Ռոդնի Դեյնջրֆիլդի այրու հետ:
«Նրա հետ հարաբերությունները այնքան էլ լուրջ չէին», ասել է Քըրքը: Իսկ Ջուանին չի հաջողվել գտնել, որպեսզի մեկնաբանի կատարվածը:
Տեղեկությունը վերցված է «Արմինյըն միրոր-սփեքթեյթըր» շաբաթաթերթից:
Հ. Ծ.