Գլենդեյլի ավագ դպրոցի դահլիճում նշվել է «Քաջ Նազար» պարբերականի լույս ընծայման 40-րդ տարեդարձը, տեղեկացնում է «Արմինյն միրոր-սփեքթեյթր» շաբաթաթերթը:
Եռամսյայի հրատարակիչ եւ գլխավոր խմբագիր Հովհաննես Բալայանի անխոնջ ջանքերի եւ թերթի շուրջը հավաքված լրագրողների, երգիծանկարիչների եւ մտավորականների ներդրումների շնորհիվ հանդեսը մեծ հաջողություններ է արձանագրել եւ դարձել ամենասիրելի ու ամենափնտրված հումորիստական-սատիրական պարբերականը սփյուռքում:
Հրատարակման նպատակը չի եղել սոսկ զվարճացնելը, այլեւ հումորով քողարկված կառուցողական քննադատության միջոցով հասնել հասարակության մեջ տիրող հոռի բարքերի վերացմանը:
Բացի խմբագրի իր պաշտոնից, Բալայանը նաեւ վարում է մեծ ձեռներեցությամբ Kach Nazar Live հեռուստատեսային ուղիղ եթերի շաբաթօրյա թողարկումները Գլենդեյլի AMGA տեղական կաբելային կայանում եւ հակառակ իր տարիքին (նա 80 տարեկան է) հոբելյանական տարեթվի առթիվ վճռականություն է հայտնել եւս 40 տարի շարունակելու իր գործը:
Մեզ մնում է շնորհավորել եւ առողջության հետ բեղմնավոր գործունեություն մաղթել նրան:
Հ. Ծ.