«ԱԼՄԱ»-յումՙ Ամերիկայի հայկական գրադարան-թանգարանում (Ուոթերթաուն) վերջերս բացումն է կատարվել 20-րդ դարի կեսերին գործող պատշաճորեն չգնահատված մի նկարիչ-արվեստագետիՙ Ռանզարի (Ֆրեդ Ռանդոլֆ Էլեզարյան) ստեղծագործությունների հետահայաց ցուցահանդեսի, որը շարունակվելու է մինչեւ 2013-ի հունվարի 31-ը:
Ռանդոլֆը ծնվել էր Սպահանում (Իրան) 1920-ին եւ Մ. Նահանգներ տեղափոխվել մոր հետ տասնչորս տարեկանում: Հաճախել էր Քեմբրիջի «Ռինջ» տեխնիկական վարժարանը, միաժամանակ նկարչության մասնավոր դասեր վերցնելով: Ծառայել էր Կենտրոնական Եվրոպայում Համաշխարհային երկրորդ պատերազմի ժամանակ որպես շարային հետեւակ եւ «Սթարզ ընդ Սթրայփս» զինվորական պարբերականի նկարիչ-դիզայներ: 1956-ին տեղափոխվել էր Նյու Ջերսի, որտեղ մինչեւ թոշակի անցնելը աշխատել է որպես ֆոտոփորագրող: Նրա նկարներում միաձուլվել են Մերձավոր Արեւելքի ավանդական ու Ամերիկայի ժողովրդական արվեստները, ոչ մի կողմին առավելություն չտալով: Նա նկարել է հիմնականում Իրանում անցկացրած իր կյանքի վաղ շրջանի հիշողությունների հիման վրա: Նրա կտավները 1960-ականներին ցուցադրվել են Նյու Յորքում: Ներկայումս դրանցից մի քանիսը կարելի է տեսնել Ուոթերթաունի Սբ Ստեփանոս եւ Ռիջֆիլդ պարկի (Նյու Ջերսի) Սբ Վարդանանց հայկական եկեղեցիների խորաններին, ինչպես նաեւ Ամերիկայի հյուսիսարեւելյան շրջանների այլ եկեղեցիներում:
Նկարիչը ամուսնացած էր Ուոթերթաունից Սիմա Նաջարյանի հետ, որը որպես բնորդուհի հանդես է եկել նրա շատ նկարների համար:
Հ. Ծ.