ՀԱՅ ՇԱԽՄԱՏԻՍՏՆԵՐԻՑ ԼԱՎԱԳՈՒՅՆԸ ԿՐԿԻՆ ԶԱՎԵՆ ԱՆԴՐԵԱՍՅԱՆՆ Է Վերջնագիծը հատեց «Աերոֆլոտի» կայծակնային մրցաշարը, որի 275 մասնակիցների թվում էին հայաստանցի 10 շախմատիստներ: Մրցաշարն անցկացվեց շվեյցարական մրցակարգով, 9 տուրով, ընդ որում մրցակիցները միմյանց հետ մրցում էին 2 անգամ: Ինչպես արագ շախմատի մրցաշարում, այնպես էլ կայծակնային խաղում հայ շախմատիստներից լավագույն արդյունքը ցույց տվեց գրոսմայստեր Զավեն Անդրեասյանը: Նա 18 հնարավորից վաստակած 12,5 միավորով զբաղեցրեց 15-րդ տեղը: Զավենը 10 պարտիա շահեց, 5-ն ավարտեց ոչ-ոքի, կրեց 3 պարտություն: 2-րդ ցուցանիշը ցույց տվեց գրոսմայստեր Տիգրան Լ. Պետրոսյանը, որը 11 միավորով գրավեց 59-րդ տեղը: ՖԻԴԵ-ի վարպետ Ռոբերտ Աղասարյանը 10,5 միավորով զբաղեցրեց 74-րդ տեղը: 10-ական միավորով համապատասխանաբար 81-րդ եւ 99-րդ տեղերը զբաղեցրին Հովհաննես Դանիելյանն ու Դավիթ Գեւորգյանը: Մեր մյուս շախմատիստների ցուցանիշներն այսպիսին են. 125. Տիգրան Քոթանջյանՙ 9, 164. Հովհաննես Գաբուզյանՙ 8, 186. Վահագն Խաչատրյանՙ 7,5, 264. Արթուր Ղարագյոզյանՙ 3,5, 267. Տիգրան Ս. Պետրոսյանՙ 2: Մրցաշարի հաղթող ճանաչվեց ռուսաստանցի գրոսմայստեր Յան Նեպոմնյաչնին, որը վաստակեց 15,5 միավոր ու արժանացավ 10 հազար դոլար պարգեւավճարի: 2-րդ տեղը 14,5 միավորով գրավեց ռուսաստանցի մեկ այլ գրոսմայստերՙ Պյոտր Սվիդլերը: Նրան հանձնվեց 7 հազար դոլար: 3-րդ տեղը գրաված նրա հայրենակից Ալեքսանդր Գրիշչուկը, որ վաստակել էր 14 միավոր, արժանացավ 5500 դոլար պարգեւավճարի: |
