ԵՐԻՏԱՍԱՐԴԱԿԱՆ ՆՎԱԳԱԽՈՒՄԲԸ` ՆՈՐ ՀԱՄԵՐԳԱՅԻՆ ԾՐԱԳՐՈՎ Մ. Հ. Հայաստանի պետական երիտասարդական նվագախումբը, գեղարվեստական ղեկավար եւ գլխավոր դիրիժոր Սերգեյ Սմբատյանի ղեկավարությամբ փետրվարի 26-ին հանդես եկավ համերգային ծրագրով: Համերգին հնչեցին` Դմիտրի Շոստակովիչի, Բելա Բարտոկի, Գեղունի Չթչյանի, Միխայիլ Կոկժաեւի, Էդուարդ Հայրապետյանի ստեղծագործությունները: Ինչպես «Ազգի» հետ զրույցում ասաց նվագախմբի մամուլի խոսնակ Մարիանա Գալստյանը , ծրագրի ընտրությունը պատահական չէր. «Է. Հայրապետյանի Միսաք Մեծարենցի համանուն ստեղծագործության խոսքերով գրված «Ինչ արբեցությամբ...» ստեղծագործությունը դեռեւս 2012 թվականի սեպտեմբերի 29-ին Դրեզդենի Ֆրաուենկիրխե եկեղեցում ներկայացվել էր Դրեզդենի Ֆիլհարմոնիկ նվագախմբի եւ Հայաստանի պետական կամերային երգչախմբի համատեղ ելույթի ընթացքում, որը ղեկավարել էր Սերգեյ Սմբատյանը: Համերգը կայացել էր Հայ կոմպոզիտորական արվեստի փառատոնի շրջանակներում, որը իր պատմության մեջ առաջին անգամ դուրս էր եկել Հայաստանի սահմաններից: Իսկ Բելա Բարտոկի ընտրությունը պայմանավորված է Հայաստանում նրա գործերի չափազանց հազվադեպ կատարմամբ: Հունգարական այս կոմպոզիտորը, դաշնակահարը, ուսուցիչն ու երաժշտագետը պատկանում է XX դարի մեծանուն այնպիսի երաժիշտ-նորարարների շարքին, ինչպիսիք են Կ. Դեբյուսին, Մ. Ռավելը, Ի. Ստրավինսկին, Ս. Պրոկոֆեւը, Դ. Շոստակովիչը: Այս հեղինակի անվան հետ է կապված XX դարի եվրոպական երաժշտության պատմության նշանակալի էջերից մեկը եւ հունգարական երաժշտական մշակույթի մի ամբողջ դարաշրջան: ՀՀ արվեստի վաստակավոր գործիչ Գեղունի Չթչյանը Հայաստանի մշակույթի պատմության մեջ անվիճելի ժողովրդականություն եւ սեր վայելող եզակի կին ստեղծագործողներից է»: Ծրագրի մյուս հատվածում հնչեցին հայ լսարանին արդեն ծանոթ ստեղծագործություններ: |
