ՖԵԴԵՐԻԿՈ ՄՈՆԴԵԼՉԻՆ ՇՈՒՏՈՎ ՀԱՅԱՍՏԱՆՈՒՄ ՄԱՆԱՆԱ ՀՈՎԱԿԻՄՅԱՆ Հայաստանի պետական կամերային նվագախումբն իր գործունեության 50-ամյակի կապակցությամբ ներկայանում է հետաքրքրական համագործակցություններով: Հոբելյանական առաջին համերգի հյուրը` «Ջազի սրբազան հրեշ» Ռիշար Գալիանոն էր: Հաջորդ համագործակցությունը կկայանա մարտի 30-ին, որի առթիվ Հայաստան է ժամանելու իտալացի հայտնի սաքսոֆոնահար Ֆեդերիկո Մոնդելչին: Կամերային նվագախմբի գեղարվեստական ղեկավար եւ գլխավոր դիրիժոր Վահան Մարտիրոսյանը «Ազգի» հետ զրույցում ասաց. «Դեռ հստակեցված չէ, թե ապագայում ինչ համագործակցությամբ հանդես կգանք: Հիմա աշխատում ենք հայտնի երաժիշտների հետ, որեպեսզի տեսնենք, թե ում հետ կստացվի համագործակցությունը: Այժմ անուններ չեմ տալիս, որպեսզի հետո չասենՙ «Բա ասում էին պիտի գա», թող անակնկալ լինի, ոչ թե նախօրոք սպասենք եւ չստացվի: Մեր համատեղ համերգին կհնչեն դասականի, ջազի, կինոնկարների երաժշտություննների, տանգոյի միքսեր»: Վ. Մարտիրոսյանն ասաց, որ Ֆեդերիկո Մոնդելչին մեծ հաճույքով համաձայնեց գալ Հայաստան եւ համագործակցել կամերային նվագախմբի հետ, ավելին, նա Հայաստանում արդեն եղել է եւ շատ լավ ճանաչում է նվագախմբին: Ֆեդերիկո Մոնդելչին անակնկալ է պատրաստել հայ հանդիսականի համար` նվագելու է հայկական երաժշտություն, թե ի՞նչ, Վ. Մարտիրոսյանը չցանկացավ բացել գաղտնիքը: Վահան Մարտիրոսյանն «Ազգին» տեղեկացրեց նաեւ, որ համերգին հնչելու են` Ալեքսանդր Գլազունով` Կոնցերտ Mib սաքսոֆոնի եւ լարայինների համար, Անտոնին Դվորժակ` Երկու սլավոնական պար լարայինների համար, Ջորջ Գերշվին` I got rhythm լարայինների համար, Էնիո Մորիկոնե` Պրոմենադ Մորիկոնեի հետ, Նիկոլա Պիովանի` La Vita est Bella /Կյանքը հիասքանչ է/, Լերոյ Անդրսեն` Plink, Plank, Plunk, The Syncopated ClockBlue, TangoFiddle-Faddle, Խավիեր Ջիրոտո` Morronga la Milonga, Աստոր Պիացոլա` Հրաժեշտի տանգո, Oblivion, Ռոբերտո Մոլինելի` Tango Club: Նշենք, որ Ֆեդերիկո Մոնդելչին միջազգային 4 եւ ազգային 2 մրցույթների դափնեկիր է: Ձայնագրել է մի շարք ձայնասկավառակներ: Համերգային շրջագայություններով հանդես է եկել աշխարհի շատ երկրներում, այդ թվում Գերմանիայում, Ճապոնիայում, ԱՄՆ-ում, Իսպանիայում, Ֆինլանդիայում: Որպես մենակատար հանդես է եկել շատ նվագախմբերում, ինչպես օրինակ Լա Սկալայի ֆիլհարմոնիկ նվագախմբում` Ս. Օզավի ղեկավարությամբ, Մոսկվայի կամերային նվագախմբում` Կ. Օրբելյանի ղեկավարությամբ: 1982թ. Ֆ. Մոնդելչին ստեղծեց «Իտալիայի սաքսոֆոններ» կվարտետը եւ այդ խմբով տվել է շուրջ 250 համերգ: Սաքսոֆոնահարն ակտիվորեն պրոպագանդում է ժամանակակից կոմպոզիտորների ստեղծագործությունները, դասավանդում է Պազերոյի կոնսերվատորիայում: |
