«ՀԱՐԱՎԿՈՎԿԱՍՅԱՆ ԵՐԿԱԹՈՒՂԻՆ» ԲԱՐՁՐԱՑՐԵՑ ԿՈՆՏԵՅՆԵՐԱՅԻՆ ԳՆԱՑՔԻ ՍԱԿԱԳՆԵՐԸ 2013 թվականի փետրվարի 1-ից վրացական երկաթուղին 3,5%-ով թանկացրել է սակագները 20-ֆուտանոց կոնտեյներների փոխադրման համար եւ հրաժարվել է 40-ֆուտանոց կոնտեյներների տեղափոխման ժամանակ կիրառվող 0,82 չափով նվազեցնող գործակցից: Հայկական բեռնափոխադրողների համար հնարավոր գնային ճնշումների նվազեցման նպատակով «Հարավկովկասյան երկաթուղի» ընկերությունը փետրվարին զսպում էր բեռնափոխադրումների սակագների թանկացումը սեփական ռեսուրսների հաշվին: Սակայն ղեկավարվելով վրացական երկաթուղու հետ կնքված միջազգային երկաթուղային հաղորդակցությունում գործող կոնտեյներային գնացքի կազմակերպման մասին համաձայնագրով եւ ձեռքբերված պայմանավորվածություններովՙ 2013 թվականի մարտի 1-ից Հայաստանի տարածքում գործողության մեջ են դրվում նոր սակագներ: Այսպիսով, սակագինը մեկ 40-ֆուտանոց բեռնված կոնտեյների համար կկազմի 0,96 դոլար մեկ տոննա-կմ համարՙ նախկին 0,78-ի դիմաց, իսկ դատարկ կոնտեյների համարՙ 0,48 դոլարՙ նախկին 0,39-ի դիմաց: Բեռնված եւ դատարկ 20-ֆուտանոց կոնտեյների համար սակագինը կկազմի համապատասխանաբար 0,56 եւ 0,28 դոլար մեկ տոննա-կմ համարՙ նախկին 0,54-ի եւ 0,27-ի դիմաց: Այս մասին տեղեկանում ենք «Հարավկովկասյան երկաթուղու» տարածած հայտարարությունից: | 
