ՆԱԽԱԳԱՀԻ ԹԵԿՆԱԾՈՒՆԵՐԻՑ ՄԵԿՆ ԱՂԱՆԴԱՎՈՐ Է Ի. Պ. Հայաստանում 2013-ին անցկացված նախագահական ընտրություններում առաջադրված թեկնածուներից մեկն աղանդավորական մի կառույցի ներկայացուցիչ է, այդ թեկնածուն նույնիսկ աղանդավորական կազմակերպություններից մեկի ղեկավարի երեխայի քավորն է: Այս մասին երեկ լրագրողների հետ հանդիպման ժամանակ հայտարարեց Քայքայիչ պաշտամունքից տուժածների վերականգնողական ու օգնության կենտրոնի նախագահ Ալեքսանդր Ամարյանը , որը թեեւ չնշեց թեկնածուի անունը, բայց նշեց, որ նրա անունն անմիջականորեն կապված է այս օրերին ծավալվող հանրահավաքների հետ: Ալեքսանդր Ամարյանը հավելեց, որ այս թեմայով նորից կխոսի, երբ ավարտվեն հետընտրական զարգացումները: Իսկ ընտրություններից առաջ Ա. Ամարյանը թեկնածուի անունը չի հրապարակել, որպեսզի հակաքարոզչություն չստացվի: Բանախոսը նաեւ հիշեցնում է, որ բոլոր երկրներում էլ գունավոր հեղափոխություններն իրականացրել են աղանդավորական շարժումների մեջ գտնվող քաղաքական գործիչները, օրինակ` Ուկրաինայում «Աստծո դեսպանատուն» կառույցի ներկայացուցիչները կարողացան հրապարակ հանել 50 հազար մարդու: Ի դեպ, վերջերս Հայաստանում սկսել են ակտիվանալ «Աստծո հարսնացուներ» եւ «Կենդանի հավաք» կոչվող աղանդները, որոնք դեմ են իշխանություններին ու կարծում են, թե իշխանությունը հենց իրենք են: Այս աղանդները Հայաստանում գործում են շուրջ մեկուկես տարի եւ ծավալում են գործունեություն կառավարության դեմ: Եվ վերջերս տարածված լուրերը, թե Հայաստան են ներթափանցել նոր աղանդներ, Ալեքսանդր Ամարյանը հերքեց` ասելով, որ դրանք ամենեւին էլ նոր չեն, ուղղակի վերանվանվել են: Դրանցից մեկը` «Աստծո հարսնացուները», մտնում է «Աստծո դեսպանատուն» հոգեւոր կառույցի մեջ: «Աստծո դեսպանատան» հայաստանյան մասնաճյուղն էլ կոչվում էր «Կենդանի հավաք», սակայն «Կենդանի հավաքը» դուրս եկավ «Աստծո դեսպանատուն» կառույցից ու հիմա ներկայացնում է առանձին ուղղություն: Ներկայումս Հայաստանում գրանցված է կրոնական 67 կազմակերպություն, իսկ առանց գրանցվելու գործունեություն են ծավալում եւս 200-ը, եւ այժմ, ըստ պարոն Ամարյանի, աղանդ բացելը դարձել է միլիոնատեր դառնալու պարզ ճանապարհ: «Օրինակ` գրանցում ես քո եկեղեցին ՀՀ պետռեգիստրում, հետո բարձրացնում աղմուկ, թե քեզ այստեղ ճնշում են, ու ի վերջո Ամերիկայից սկսում են քեզ ֆինանսավորել», ավելացրեց Ա. Ամարյանը: |
