ՀԱՅՑԱԴԻՄՈՒՄ ՄԻԵԴ-ԻՆ. ՍԱՖԱՐՈՎԻՆ ՏԵՂԱՓՈԽԵԼ ԵՐՐՈՐԴ ԵՐԿԻՐՙ ՊԱՏԻԺԸ ԿՐԵԼՈՒ ՀԱՄԱՐ Հ. Հ. Սիրանուշ Սահակյանը «Իրավունքների պաշտպանություն առանց սահմանների» ՀԿ նախագահն ու Մարդու իրավունքների եվրոպական դատարանում Գուրգեն Մարգարյանի ընտանիքի եւ Հայկ Մակուչյանի շահերի ներկայացուցիչն է: Նրա գնահատմամբՙ Մարդու իրավունքների եվրոպական դատարանում ադրբեջանցի մարդասպան Սաֆարովի կողմից գազանաբար սպանված հայ սպա Գուրգեն Մարգարյանի գործով գնահատականները կլինեն սուր: Սահակյանի փոխանցմամբՙ հիմնական հարցադրումը, որ բարձրաձայնվել է դատարանում, նշված է, որ սպանությունը պայմանավորված է բացառիկ էթնիկ հիմքով: Հայկական կողմը դատական հայցով պահանջ է ուղղել Ադրբեջանինՙ հանցագործին երրորդ պետությանը հանձնելու եւ այնտեղ պատժի կրումը շարունակելու համար, քանի որ անհնար է, որ Ադրբեջանում ազգային հերոս համարվող Սաֆարովը պատիժ կրի: Հայցի շրջանակներումՙ Գուրգեն Մարգարյանի ընտանիքի անդամները հրաժարվել են նյութական եւ բարոյական հատուցումիցՙ հայտարարելով, որ ոչինչ չի կարող զավակի կորուստը լրացնել: «Գուրգեն Մարգարյանի մայրը ցանկություն էր հայտնել որպես սփոփանք դատական հայցում ներառելու հայազգի ռազմագերիների ազատ արձակումը: Ցավոք, ռազմագերիների վերադարձի պահանջն իրատեսական չէ, քանի որ առարկայի շրջանակներից դուրս է», ասաց Սահակյանըՙ հավելելով, որ ՄԻԵԴ-ում գործի քննությունը տեւում է միջինը 2-4 տարի, սակայն Մարգարյանի գործը առաջնահերթությունների ցանկում է, եւ դատարանն այդ հայցով արագ կզբաղվի. ամենայն հավանականությամբ կտեւի 6-12 ամիս: «Ազգ»-ը տեղեկացրել էր, որ փետրվարի 28-ին Գուրգեն Մարգարյանի իրավահաջորդների ու Հայկ Մակուչյանի ներկայացուցիչներն անհատական գանգատ էին ներկայացրել ՄԻԵԴ: Ադրբեջանցի սպա Ռամիլ Սաֆարովը 2004-ի փետրվարի 19-ին Բուդապեշտում ՆԱՏՕ-ի եռամսյա անգլերենի դասընթացների մասնակցության ժամանակ գիշերը կացնի 16 հարվածներով դաժանաբար սպանել է քնած հայ սպա Գուրգեն Մարգարյանին: Հունգարական դատարանը Սաֆարովին դատապարտել էր ցմահ բանտարկությանՙ պատիժը 30 տարի չվերանայելու պայմանով, սակայն 2012թ. օգոստոսի 31-ին Սաֆարովն արտահանձնվել է Ադրբեջան, որտեղ իբր պետք է շարունակեր պատիժը կրել: Սակայն հենց օդանավակայանում Ադրբեջանի նախագահ Իլհամ Ալիեւ նրան ներում է շնորհել, ազատ արձակել, տրամադրել 8 տարվա աշխատավարձը, նվիրել բնակարան ու արժանացրել մայորի կոչման: Միջազգային հանրությունը քննադատեց Ադրբեջանի այդ քայլը: Հայաստանը խզեց դիվանագիտական բոլոր հարաբերությունները Հունգարիայի հետ, ՀՀ նախագահի հանձնարարությամբ ստեղծվեց աշխատանքային խումբՙ Ռամիլ Սաֆարովի ներման դեմ միջազգային բողոքարկման կապակցությամբ: | 
