ՄԻՊ. ՀՔԾ-Ն ԲԱՎԱՐԱՐ ԱՐԴՅՈՒՆԱՎԵՏՈՒԹՅԱՄԲ ՉԻ ԿԱՏԱՐԵԼ ԻՐ ԳՈՐԾԱՌՈՒՅԹՆԵՐԸ ՄԱՐՏԻ 1-Ի ԳՈՐԾԻ ԱՌՆՉՈՒԹՅԱՄԲ Հ. Հ. Մարդու իրավունքների պաշտպան Կարեն Անդրեասյանը Մարդու իրավունքների պաշտպանի ամենամյա զեկույցի շրջանակներում ներկայացրել է դատախազության եւ հատուկ քննչական ծառայության կառույցներում մեկ տարվա ընթացքում արձանագրված թերացումներն ու դրական գործընթացները: Ըստ օմբուդսմենի, դատախազական հսկողության հետեւանքով բազմաթիվ քաղաքացիների իրավունքներ սահմանափակվում եւ խախտվում են, մտահոգիչ է նաեւ լիազորությունների չարաշահումը: Լիարժեք եւ օբյեկտիվ բացահայտված չէ խաղաղ պայմաններում բանակում մահացած անձանց գրեթե տասնամյա հնության քրեական գործերը: Դատախազությունը չի ձեռնարկել բավարար միջոցներ խորհրդարանական ընտրությունների ժամանակ ընտրակաշառք տալու դեպքերը բազմակողմանի եւ օբյեկտիվ ուսումնասիրելու համար: Արձանագրվել են ձերբակալված եւ կալանավորված անձանց իրավունքների խախտումներ: «ՀՔԾ-ն բավարար արդյունավետությամբ չի կատարել իր գործառույթներըՙ կապված մարտի 1-ի 10 զոհերի մահվան փաստով կատարված նախաքննության հետ: ՀՔԾ-ն հաճախ չի պահպանել քրեական գործերի նախաքննության օրենքով սահմանված ժամկետները»: Խնդիրներին զուգահեռ, Անդրեասյանն արձանագրում է նաեւ դրական զարգացումներ, մասնավորապես, նախորդ տարիների համեմատությամբ աճել է ծառայության կողմից վարույթում քննված գործերի քանակը: Դատախազությունն ու ծառայությունը հիմնականում ապահովել են գործունեության թափանցիկություն եւ հրապարակայնություն: | 
