ՓՈՔՐ ԿԵՆՏՐՈՆԻ ԿԱՌՈՒՑԱՊԱՏՄԱՆ ՀԱՄԱՐ ԱՎԵԼԻ ԽԻՍՏ ՉԱՓԱՆԻՇՆԵՐ Կառավարությունը երեկ հաստատեց «Երեւանի փոքր կենտրոնի կառուցապատման մասին» օրենքի հայեցակարգը: Կարեւորելով այս փաստաթուղթըՙ վարչապետ Տիգրան Սարգսյանը նշեց, որ «սա մեր նախընտրական խոստումներից է, կարեւորագույն հարց է, որը մշտապես երեւանցիների ուշադրության կենտրոնում է»: Հայեցակարգի մասին լրագրողներին որոշ մանրամասներ հաղորդեց քաղաքաշինության փոխնախարար Ռուզան Ալավերդյանը : Նրա հաղորդմամբՙ այս հայեցակարգը հնարավորություն կտա թուլացնելու Երեւանի կենտրոնի գերբեռնվածությունը` կիրառելով տնտեսական, հարկային լծակներ, սեյսմիկ ռիսկերը հաշվի առնվելով: Ավելի խիստ չափանիշներ կսահմանվեն Երեւանի կենտրոնում կառուցապատման համար, կտարանջատվեն կառուցապատման ենթակա տարածքները: Ռուզան Ալավերդյանը հայտնեց նաեւ, որ խոսքը Կասկադով, Չարենցի փողոցով մինչեւ «Այրարատ» կինոթատրոն, ապա Ծիծեռնակաբերդով մինչեւ Բաղրամյան պողոտա ընկած տարածքի մասին է: Հայեցակարգը օրենք կդառնա 6 ամսվա ընթացքում: «Ազգ»-ի հարցին, թե արդյոք ուշացած չէ՞ այս հայեցակարգի եւ առանձին օրենքի ընդունումը, Ռուզան Ալավերդյանը պատասխանեց, որ միշտ էլ կարելի է դա ասել, բայց հիմա էլ ուշ չէ կարգավորել Երեւանի փոքր կենտրոնի կառուցապատման հարցերը: |
