ՊԱՐՍԿԵՐԵՆԻ ԵՎ ՊԱՐՍԿԱԿԱՆ ՄՇԱԿՈՒՅԹԻ ԿԵՆՏՐՈՆԻ ԲԱՑՈՒՄ ՄԵՐԻ ԴԱԼԼԱՔՅԱՆ, ԵՊԼՀ հանրային կապերի համակարգող Մարտի 18-ին, ժամը 15:00-ին, ԵՊԼՀ-ում տեղի ունեցավ Պարսկերենի եւ պարսկական մշակույթի կենտրոնի բացման արարողությունը: Կենտրոնի նպատակն է տարածել պարսկերենը եւ պարսկական մշակույթը, ինչպես նաեւ նպաստել հայ-պասկական հարաբերությունների զարգացմանը: Միջոցառմանը ներկա էր Հայաստանի Հանրապետությունում Իրանի Իսլամական Հանրապետության դեսպան պարոն Մահամմադ Ռեյիսին: ԵՊԼՀ-ի ռեկտոր տիկին Գասպարյանը խոսեց պարսկերենի եւ պարսկական մշակույթի կենտրոնի ներկա եւ հետագա աշխատանքներից: «Մենք պլանավորում ենք Պարսկերենի եւ պարսկական մշակույթի կենտրոնը հետագայում դարձնել նաեւ իրանագիտության կենտրոնՙ այդպիսով մեր փոքրիկ ներդրումն ունենալ հայ-պարսկական հարաբերությունների զարգացման եւ ընդլայնման գործում»,-նշեց տիկին Գասպարյանը: Պարոն Ռեյիսին իր խոսքում նշեց, որ «հայ-պարսկական հարաբերությունները դարերի պատմություն ունեն. այդ են վկայում Սպահանում եւ Թեհրանի որոշ համալսարաններում արդեն 50 տարվա գոյություն ունեցող հայագիտական ծրագրերը, Թեհրանում գործող հայալեզու օրաթերթը եւ հանդեսները»: Կենտրոնի բացման շրջանակներում ԵՊԼՀ-ի պարսկերեն սովորող ուսանողները բեմադրեցին Հ. Թումանյանի «Անխելք մարդը» հեքիաթի պարսկերեն տարբերակը եւ նաեւ ասմունքեցին նույն լեզվով: | 
