ԾԱՂԻԿՆԵՐ ՀՈՐ ՀՈՒՇԱՐՁԱՆԻՆ` ՄԻԱՅՆ ԵՐԿՐՈՐԴ ՓՈՐՁԻՑ ՎԱՀՐԱՄ ԱԹԱՆԵՍՅԱՆ Երեկ արտակարգ միջադեպ է գրանցվել Սումգայիթում: Քաղաք էր այցելել Իլհամ Ալիեւը, որպեսզի անձամբ կտրի «մի շարք նոր օբյեկտների բացման» կարմիր ժապավենները: Սումգայիթի հասարակության մի խումբ համարձակ ներկայացուցիչներ, տեղյակ լինելով, որ նախագահը չի կարող քաղաքից հեռանալ առանց հոր հուշարձանին հարգանքի տուրք մատուցելու, նախապես հավաքվել են Հեյդար Ալիեւի անվան հրապարակում: Երբ Իլհամ Ալիեւի նախագահական շարասյունը մոտեցել է հրապարակին, մի քանի քաղաքացի նետվել են առաջ, որպեսզի նրան հաղորդեն տեղական իշխանության մարմիններից բնակչության բողոքը: Ոստիկաններն արգելափակել են դժգոհ մարդկանց ճանապարհը: Դրան հետեւել է մյուս բողոքավորների հախուռն հարձակումը ոստիկանների վրա: Սկսվել է ծեծկռտուք, եւ Իլհամ Ալիեւն ստիպված է եղել արագորեն լքել Հեյդար Ալիեւի անվան հրապարակը: Մի քանի ժամ շարունակ ոստիկանների եւ զայրացած քաղաքացիների միջեւ ձեռնամարտը շարունակվել է: Օգնության շտապած հատուկջոկատայինները դաժան ծեծի են ենթարկել բողոքավորներին: Տեղի են ունեցել զանգվածային ձերբակալություններ: Բնակչության եւ ոստիկանության շրջանում եղել են տուժողներ: Այնուամենայնիվ, իշխանություններին հաջողվել է Հեյդար Ալիեւի անվան հրապարակը մաքրել ցուցարարներից եւ հնարավորություն ստեղծել, որ Իլհամ Ալիեւը լիակատար անվտանգության պայմաններում կատարի որդիական պարտքը: Ուշագրավ է, որ այս ամենը տեղի է ունենում իշխող «Ենի Ազարբայջան» կուսակցության անցկացրած «սոցիոլոգիական հարցումների» ֆոնի վրա, ըստ որի «բնակչության 92 տոկոսը պաշտպանում է Իլհամ Ալիեւի ներքին եւ արտաքին քաղաքականությունը»: Իրականության մեջ, սակայն, Բաքվից ընդամենը 25 կմ հեռավորության Սումգայիթ քաղաքում իշխող վարչախմբի հանդեպ մարդկանց ատելությունն այնքան ուժեղ է, որ «նորին բռնապետական մեծությունը» միայն երկրորդ փորձից է կարողացել հոր հուշարձանին ծաղիկներ դնել: | 
