ՄԱՆԿԱԿԱՆ ՆՈՐ ՀԻՎԱՆԴԱՆՈՑ ԿԲԱՑՎԻ ԵՐԵՎԱՆՈՒՄ Ի. Պ. Առողջապահության նախարար Դերենիկ Դումանյանը երեկ ընդունել է Հռոմի «Թոր Վերգատա» բժշկական համալսարանի ռեկտոր Ռենատո Լաուրոյի ղեկավարած պատվիրակությանը, որը Հայաստանում է բարեգործական առաքելությամբ, իսկ առաքելությունը Հայաստանում մանկական նոր հիվանդանոց բացելն է: Ըստ Ռենատո Լաուրոյի ` Հայաստանում մանկական հիվանդանոց բացելու գաղափարը ծնվել է Իտալիայում` այդ ժամանակ Իտալիայում Հայաստանի դեսպան Ռուբեն Կարապետյանի հետ հանդիպումներից հետո: Առողջապահության նախարարության փոխանցմամբ` Հռոմի «Թոր Վերգատա» համալսարանը, 40 հազար ուսանողով, հիվանդանոցներ բացելու արդեն իսկ մեծ փորձառություն ունի, կառուցել է մանկական հիվանդանոցներ Ալբանիայում եւ Կոնգոյում, իսկ Հռոմում վերջերս կառուցեց 800 մահճակալով հիվանդանոցային համալիր: Պատվիրակության անդամները Դերենիկ Դումանյանին ասել են, որ Երեւանում մանկական հիվանդանոցի կառուցման վայրը հստակեցնելուց հետո ձեռնամուխ կլինեն միջոցների հայթայթմանը: Իտալական պատվիրակությունը, ցուցաբերելով հետաքրքրություն նաեւ Հայաստանում ոսկրածուծի փոխպատվաստման հեռանկարի հանդեպ, պատրաստակամություն է հայտնել համագործակցելու ինչպես այդ, այնպես էլ դեղագործության ոլորտներում: | 
