ՄՈՆՍԵՐԱՏ ԿԱԲԱԼՅԵԻ ՀԱՄԵՐԳԸ ՀՊԵՆ-Ի ՀԵՏ ՄԱՆԱՆԱ ՀՈՎԱԿԻՄՅԱՆ Հանրահայտ օպերային երգչուհի Մոնսերատ Կաբալյեն, որը օրերս նշեց ծննդյան 80-ամյակը, շուտով համերագային ծրագրով հանդես կգա Հայաստանում: Հունիսի 9-ին Ալ. Սպենդարիանի անվան օպերայի եւ բալետի ազգային ակադեմիական թատրոնում տեղի կունենա աշխարհահռչակ երգչուհու համերգը Հայաստանի պետական երիտասարդական նվագախմբի հետ, «Ազգի» հետ զրույցում տեղեկացրեց համերգի կազմակերպիչ Վահագն Գեւորգյանը : Տոմսերը դեռ վաճառքում չեն եւ գներն էլ հստակեցված չեն: Վ. Գեւորգյանը հավելյալ մանրամասներ չհաղորդեց` նշելով, որ շուտով տեղի կունենա մամուլի ասուլիսը, որի ժամանակ սպառիչ պատասխաններ կտան համերգի մասին: Նշենք, որ Մոնսերատ Կաբալյեն հունիսին համերգային ծրագրով բացի Հայաստանում հանդես կգա նաեւ Գերմանիայում եւ Ռուսաստանում: Երգչուհին ծնվել է Բարսելոնայում: 1954թ-ին գերազանցությամբ ավարտել տեղի Ֆիլհարմոնիկ դրամատիկական լիցեյը, իսկ 2 տարի անց դարձել Բազելի թատրոնի մենակատարուհ: Միջազգային ճանաչում Կաբալյեն ձեռք է բերել 1965-ին. Նյու Յորքի «Կարնեգի հոլ» համերգային սրահում արիաներից մեկում նա փոխարինում է ամերիկուհի Մերիլին Հորնին եւ նրա այդ կատարումը դառնում է սենսացիա օպերայի աշխարհում: Դահլիճը ծափահարում է 20 րոպե: 1992 թվականին հիվանդության պատճառով առաջացան ձայնային խնդիրներ եւ երգչուհին ժամանակավորապես դադարեցրեց իր ելույթները օպերայում երգելով միայն համերգային դահլիճներում: 2002 թվականին Մոնսերատը կրկին ելույթ ունեցավ օպերայում: Կաբալյեն զբաղվում է նաեւ բարեգործությամբ եւ ՄԱԿ-ի պատվավոր դեսպան է, ինչպես նաեւ ՅՈՒՆԵՍԿՕ-ի բարի կամքի դեսպան Մոնսերատ Կաբալյեն համարվում է մեր օրերի լավագույն սոպրանոն, ով արժանացել է բազմաթիվ միջազգային պարգեւների: Նրան անվանում են նաեւ «ոսկե սրտով երգչուհի», քանի որ նա իր ժամանակի մեծ մասը ծախսում է հասարակական գործունեության եւ բարեգործությունների վրա: | 
