ԼԻՏՎԱԲՆԱԿ ՀԱՅ ՌԵԺԻՍՈՐԻ ՖԻԼՄԸ ԳԼԽԱՎՈՐ ՄՐՑԱՆԱԿԻ Է ԱՐԺԱՆԱՑԵԼ ԳԱՐԻԿ ԱՎԵՏԻՍՅԱՆ Լիտվաբնակ հայ ռեժիսոր Մարատ Սարգսյանի «Հայր» ֆիլմը Եվրոպայի վավերագրական ֆիլմերի ամենամեծ փառատոներից մեկումՙ «Visions Du Reel», արժանացել է գլխավոր մրցանակին: Նշենք, որ փառատոնն անցկացվել է Շվեյցարիայում: Այս տարի փառատոնին մասնակցության հայտ է ներկայացվել 3500 ֆիլմ, որոնցից 110-ը անցել էին վերջնական փուլ: «Հայր» ֆիլմը ներկայացնում է Վիդաս Անտոնովի այսօրվա կյանքը, որը տարիներ առաջ խորհրդային բանկերից ու պետական կազմակերպություններից գողացել էր մոտ 1 միլիոն ռուբլի եւ համարվում է 20-րդ դարի Խ. Միության ամենահետաքրքիր հանցագործներից մեկը: Տասնհինգ տարբեր բանտերում նա անց է կացրել քսան տարի: Այսօր նա 73 տարեկան է, ունի 11 երեխա, երեք թոռ եւ նորածին որդի: Կինոփառատոնի գլխավոր տնօրեն Լուչիանո Բարիսոնը ֆիլմը ներկայացրել է հետեւյալ կերպ. ««Հայր» վավերագրական ֆիլմը ` գայնության եւ անգուշակելիության ռեֆլեկսիա է, նկարահանված չափազանց հուզիչ կադրով եւ վարպետորեն ներկայացված պատմության շնորհիվ»: Նշենք, որ ռեժիսոր Մարատ Սարգսյանի «Լեռնավան» ֆիլմը 2010թ. հայ դիտողին էր ներկայացվել «Ոսկե ծիրան» կինոփառատոնի շրջանակներում եւ արժանացել երկու մրցանակի: Նրա ֆիլմերը միջազգային մի շարք փառատոներում ճանաչվել են լավագույնը: | 
