ՌՈՒՍԱԿԱՆ ՌԱԶՄԱՆԱՎԵՐ ՄԻՋԵՐԿՐԱԿԱՆ ԾՈՎՈՒՄ Վերջին տասնամյակների ընթացքում առաջին անգամ Ռուսաստանի ծովուժի խաղաղօվկիանոսյան նավատորմի մի խումբ ռազմանավեր Սուեզի ջրանցքով Կարմիր ծովից անցել են Միջերկրական ծով: ՌԻԱ գործակալության տվյալներով, այդ նավերը կմտնեն միջերկրածովյան էսկադրայի մեջ, որի կազմավորմանը ձեռնամուխ է եղել ՌԴ պաշտպանության նախարարությունը: «Նավերի ջոկատը հաջողությամբ անցավ Սուեզի ջրանցքը եւ դուրս եկավ Միջերկրական ծով: Վերջին մի քանի տասնամյակների ընթացքում սա խաղաղօվկիանոսյան նավատորմի ռազմանավերի առաջին մուտքն է տվյալ շրջան», հայտարարվել է նավատորմի ներկայացուցիչ, առաջին կարգի նավապետ Ռոման Մարտովը: Ջոկատի կազմի մեջ մտնում են «Ադմիրալ Պանտելեեւ» մեծ հակասուզանավային ռազմանավը, «Ադմիրալ Նեւելսկոյ» եւ «Պերեսվետ» մեծ դեսանտանավերը, «Ֆոտիյ Կռիլով» փրկարարական նավը եւ «Պեչենգա» տանկերը: Նավատորմի ներկայացուցչի խոսքերովՙ նավախումբը շարժվում է դեպի Արեւելյան Միջերկրածովքՙ դեպի Թուրքիայի, Սիրիայի, Լիբանանի, Իսրայելի, Կիպրոսի եւ Եգիպտոսի ափերը: Նախատեսվում է, որ առաջին նավահանգիստը կլինի Լիմասոլը (Կիպրոս): Նավախմբի հետագա գործողությունների մասին առայժմ ոչինչ չի հաղորդվում: Ավելի վաղ հաղորդվել էր, որ միջերկրածովյան էսկադրայի մշտական բազավորման կենտրոններ կարող են դառնալ Նովոռոսիյսկը եւ (կամ) Սեւաստոպոլը: Բացի դրանից, Ռուսաստանը նյութատեխնիկական ապահովման կենտրոն ունի սիրիական Տարտուս նավահանգստում, սակայն բազավորման այդ կետը բարձիթողի տեխնիկական վիճակում է եւ չի կարող միաժամանակ ընդունել մեծ թվով ռազմանավեր: Միջերկրածովյան էսկադրայի կազմավորման անհրաժեշտության մասին հայտարարելովՙ ՌԴ պաշտպանության նախարար Սերգեյ Շոյգուն նշել է, որ դրա խնդիրը կլինի «երկրի շահերի պաշտպանությունը Միջերկրական ծովում»: Թե մոտ ժամանակներս ռազմանավերի ջոկատը ինչ խնդիրներ է կատարելու, չի հաղորդվում: | 
