ԳԵՐՄԱՆԻԱՅԻ «ԿՈՄԻՏԱՍ» ՄԻՋԱԶԳԱՅԻՆ ՓԱՌԱՏՈՆՈՒՄ ՀԱՂԹԵՑ ԿՈՄԻՏԱՍՅԱՆ ԵՐԱԺՇՏՈՒԹՅՈՒՆԸ ՀԱԿՈԲ ԱՍԱՏՐՅԱՆ, Պրահա ՊՐՅՈԹՑԵԼ (ԳԵՐՄԱՆԻԱ)- Հունիսի 1-ին Գերմանիայի Բրանդենբուրգի երկրամասի Պրյոթցել ավանի վերանորոգված դղյակում 2-րդ անգամ տեղի ունեցավ «Կոմիտաս» միջազգային փառատոնըՙ հովանավորությամբ Արամ եւ Վահրամ Եկավյան եղբայրների: Ինչպես գրել էինք 2011-ի առաջին փառատոնի օրերին, ձեռնարկի գլխավոր նպատակն է գերմանացի երաժշտասեր հասարակայնությանն ավելի մոտիկից ծանոթացնել Կոմիտասի ժառանգությանը: Այս անգամ փառատոնը տեւել է մեկ օր եւ մրցույթն անցկացվել է երկու անվանակարգերումՙ դաշնամուրի եւ վոկալի, որոնցում առաջին տեղերը գրավել են Ճապոնիան (Takahiro Akiba) եւ Ռուսաստանը (Maria Kalesidis) ներկայացնող երիտասարդ երաժիշտները: Ուրախալի է, որ Հայաստանը ներկայացնող Էվա Ոսկանյանը, որի պատկերն արդեն երկրորդ անգամ է երեւում փառատոնի ազդագրերին, դաշնամուրային մրցույթում գրավել է 3-րդ տեղը, եւ միակն է, որ թե վոկալի եւ թե դաշնամուրային ելույթի համար արժանացել է Պրյոթցելի «Հանդիսատեսի համակրանք,» մրցանակին: Վոկալի մրցույթում երրորդ տեղն է զբաղեցրել նաեւ հայաստանցի Սոնա Վարպետյանը, ով նույնպես երկրորդ անգամ էր մասնակցում փառատոնին: Դաշնամուրի անվանակարգում երկրորդ տեղը բաժանել են Լեւոն Ավագյանն (Ավստրիա) ու Մարիա Անաստասիա Հոփֆերը (Գերմանիա), իսկ վոկալի երկրորդ տեղը բաժին է ընկել Ռոբերտ Էլիբայ Հարթոգին (ԱՄՆ): Փառատոնի միջազգային ժյուրին ղեկավարել է Հայաստանի վաստակավոր արտիստուհի, Երեւանի Կոմիտասի անվան կոնսերվատորիայի պրոֆեսոր Մարինե Աբրահամյանը, ով փառատոնի ավարտին հանդես է եկել դաշնամուրային մենահամերգով: Փառատոնի ընթացքում փոքրիկ գերմանացիների նկարած նկարներով հանգանակված եւ մրցանակ շահած մասնակիցների նվիրաբերած 960 եվրոն պետք է ուղարկվի Հայաստանի «Նվիրիր կյանք» բարեգործական հիմնադրամինՙ քաղցկեղով հիվանդ երեխաների հաշվեհամարին: Փառատոնի շրջանակներում ցուցադրվել են արվեստագետ Գուրգեն Հակոբյանի (Հայաստան) նկարներն ու քանդակները: Ներկաներին ողջունել է նաեւ Տեր Գնելը, ով կարդացել է Գերմանահայոց թեմի առաջնորդ Գարեգին արք. Բեքչյանի ուղերձը: Փառատոնի գեղարվեստական ղեկավարն էր Կարինե Գիլանյանը, իսկ վարողըՙ Ռիչարդ Նորդեմալմը: Կազմակերպչական ողջ հոգսը իրենց ուսերին են տարել Վահրամ Եկավյանը եւ նրա կինըՙ Ելենա Դմիտրեւան: Փառատոնի մասին մանրամասները եւ տպավորությունները կարդացեք «Օրեր» հանդեսի առաջիկա համարում: | 
