ԼԱՎՐՈՎ. «ՊԱՏՐԱՍՏ ԵՆՔ ԱՊԱՀՈՎԵԼՈՒ ԳՈԼԱՆԻ ԱՆՎՏԱՆԳՈՒԹՅՈՒՆԸ» Պ. Ք. ՌԴ արտգործնախարար Սերգեյ Լավրովը Ռիո դե Ժանեյրոյում լրագրողների հարցերին պատասխանելիս հայտարարել է, որ Ռուսաստանը պատրաստ է խաղաղարարներ ուղարկել Գոլանի բարձունքներ, եւ որ այդ նախաձեռնությունը թելադրված է ոչ թե տարածաշրջանում ՌԴ ազդեցությունը ուժեղացնելու ցանկությամբ, այլ «Մերձավոր Արեւելքի մի անկայուն հատվածի անվտանգությունն ապահովելու ձգտմամբ»: ՌԻԱ գործակալությունը մեջբերում է Լավրովի այն խոսքը, թե տվյալ հարցի վերջնական լուծումը կախված է Իսրայելի եւ Սիրիայի դիրքորոշումներից: ՌԴ պաշտպանության նախարարության աղբյուրներ վկայակոչելովՙ «Նեզավիսիմայա գազետա» թերթը գրում է, որ ՄԱԿ-ի, Իսրայելի եւ Սիրիայի թույլտվությունը ստանալու դեպքում Ռուսաստանը Գոլանի բարձունքներ կուղարկի 31-րդ առանձին դեսանտագրոհային բրիգադի մի գումարտակ, ինչպես նաեւ «Մի-8» փոխադրական եւ «Մի-24» հարվածային ուղղաթիռներ: Այս շաբաթ խաղաղօվկիանոսյան Ֆիջի կղզի-պետությունը որոշեց զինծառայողներ ուղարկել Գոլանՙ ՄԱԿ-ի դիտարման ու տարանջատման ուժերի կազմում ծառայելու: Գոլանի բարձունքներումՙ սիրիա-իսրայելական սահմանի շրջանում, ներկայումս լարված իրավիճակ է: Սիրիայում բանակի եւ ապստամբների կատաղի բախումներ են տեղի ունենում Կունեյտրայի շրջակայքումՙ ՄԱԿ-ի խաղաղարարների դիրքերի մոտ: Հունիսի 12-ի առավոտյան մարտերը վերսկսվեցին: Նույն օրը ավստրիացի զինծառայողները սկսեցին հեռանալ Գոլանից: Ավելի վաղ համանման որոշում էին ընդունել Խորվաթիան, Կանադան եւ Ճապոնիան: Ավստրիացիները հեռանալուց հետո Գոլանի բարձունքներում կմնա ՄԱԿ-ի 600 խաղաղարար: Ֆիջին շուտով կուղարկի մոտ 200 զինծառայող: ՄԱԿ-ի խաղաղարարները այնտեղ զբաղվում են միայն դիտարկմամբ եւ չեն միջամտում զինված հակամարտություններին: | 
