ՖԻՆԼԱՆԴԻԱՅՈՒՄ ԱՎԱՐՏՎԵՑ ԵՎՐՈՊԱԿԱՆ ԱՍՏՂԱԳԻՏԱԿԱՆ ՀԱՄԱԳՈՒՄԱՐԸ Ի. Պ. Ֆինլանդիայի Տուրկու քաղաքում իր աշխատանքներն ավարտեց Եվրոպական աստղագիտական համագումարը, որը պաշտոնապես կոչվում է «Աստղագիտության եւ տիեզերագիտության եվրոպական շաբաթ»: Այս տարի այն անցկացվեց հուլիսի 8-13-ին: Սա Եվրոպայի աստղագետների տարվա գլխավոր իրադարձությունն է եւ անցկացվում է ամեն տարի եվրոպական երկրներից որեւէ մեկում: Համագումարին ներկա են եղել 51 երկրի շուրջ 650 աստղագետներ, ներառյալ ճանաչված գիտնականներ ու եվրոպական աստղագիտական կառույցների ղեկավարներ: Իսկ Հայաստանից համագումարին մասնակցում էր Հայկական աստղագիտական ընկերության համանախագահ Արեգ Միքայելյանը: Հայկական աստղագիտական ընկերությունից տեղեկացանք, որ եվրոպական համագումարի ընթացքում անցկացվել են 12 գիտաժողով, 14 հատուկ նստաշրջան, 9 հատուկ խորհրդակցություն եւ այլ միջոցառումներ: Արդեն հայտնի է, որ եվրոպական աստղագիտական հաջորդ համագումարը տեղի կունենա Շվեյցարիայի Ժնեւ քաղաքում 2014 թվականի հունիսի 30-ից հուլիսի 4-ը: | 
