ՀԱՅԱԳԻՏԱԿԱՆ ՈՒՍՄԱՆՑ ԾՐԱԳԻՐ Դասախօսութիւն նուիրուած Գրիգոր Պըլտեանին Գրիգոր Պըլտեանՙ սփիւռքի հազուագիւտ դէմքերէն, բացառիկ մշակուած միտքի տէր այն քիչ գրողներէն է, որ անջնջելի հետք ձգած է ժամանակակից հայ գրականութեան եւ գրականագիտութեան մէջ: Անոր գրականութիւնը կը բերէ սփիւռքի երկրորդ սերունդի փորձառութիւնը, այն, որ ծնած է դուրսը, բայց ընտանեկան պատմութեան ընդմէջէն կը պահէ կապը անցեալին հետ, որը ձեւով մը խորհրդանշական վայր էՙ միշտ նուաճելի գրութեամբ: Պըլտեան ինքզինք կը համարէ «վկաներու վկան», որուն դերը աքսորի, աղէտի, յիշողութեան եւ եկլեզուութեան թեմաներու արծարծումով, կեանքի կը կոչէ երեւակայական այն միջավայրը, որուն մէջ կը ձեւաւորուի սփիւռքի մտաւորականը, անՙ որուն վիճակուած է վկաներու բանաւոր պատումը գրի առնել: Դասախօսը պիտի խօսի այն մասին, թէ ինչու պատումները երեւակայական են, ուշադրութիւն դարձնելով այն իրողութեան վրայ, որ կազմաւորուող մտաւորականի համար մանկութիւնը ու անոր հետ առնչուող միջավայրը, մարդիկը, պատմութիւնները, մէկ խօսքովՙ յիշողութիւնները բանաւոր են, որոնք ենթակայ են ոչնչանալու: Պըլտեան յիշողությունը կը դիտարկէ մանկութենէն փրկուած լուսանկարի ենթախորքին, զոր կը փորձէ ամբողջացնել գրականութեամբ: Հետեւաբար դասախօսը հիմնականը նկատի պիտի առնէ պատկերի եւ լեզուի փոխյարաբերութիւնը: Սոյն ձեռնարկը տեղի պիտի ունենայ Լոնտոնի Հայ տան մէջ (25 Cheniston Gardens, London, W8 6TC), կիրակի 21 յուլիս, ժամը 14:00-ին: Զեկուցաբերըՙ դոկտ. Սիրանոյշ Տվոյեանն է, Քեմպրիճի համալսարանէն, իսկ զեկուցավարըՙ դոկտ. Գրիգոր Մոսկոֆեանը: Հայագիտական Ուսմանց ծրագիրը կը հովանաւորուի Գալուստ Կիւլպենկեան հիմնարկութեան կողմէ: |
