ՀԱՅ ՍԱՄԲԻՍՏՆԵՐԸ 2 ԲՐՈՆԶԵ ՄԵԴԱԼ ՆՎԱՃԵՑԻՆ Կազանում ընթացող համաշխարհային ուսանողական խաղերում հայ սամբիստները 2 բրոնզե մեդալ նվաճեցին: Մինչեւ 82 կգ քաշային կարգում 3-րդ մրցանակակիր դարձավ Մհեր Կարապետյանը: Առաջին գոտեմարտում նա պարտություն կրեց վրացի Նիկո Կուցիայից (1-2): Քանի որ վերջինս հասավ մինչեւ եզրափակիչ, ուստի հայ սամբիստն իրավունք ստացավ պայքարելու բրոնզե մեդալի համար: Այդ պայքարում հաջողությունն ուղեկցեց Մհեր Կարապետյանին: Հաջորդաբար հաղթելով ուկրաինացի Սերգեյ Գոնչուկին (4-0) եւ լիտվացի Ռադվիլաս Մատուկասին (1-0), Մհերը բրոնզե մեդալ նվաճեց: Գրեթե նույնպիսի սցենարով անցան գերծանրքաշային Հակոբ Առաքելյանի գոտեմարտերը: Առաջին գոտեմարտում նա հաղթեց վրացի Ռոստոմի Խախալեյշվիլուն (2-0), իսկ 2-րդում պարտության մատնեց ադրբեջանցի Էլշան Ջաֆարլիին (4-1): Կիսաեզրափակիչում հայ սամբիստի մրցակիցը ռուսաստանցի Ալեքսանդր Կուչումովն էր: Վերջինս ուժեղ գտնվեց հայ սամբիստից եւ հաղթելով 12-4 հաշվով, մտավ եզրափակիչ: Իսկ Առաքելյանը բրոնզե մեդալի համար պայքարում առավելության հասավ կորեացի Յոն Հոպիոյի նկատմամբ (2-1): | 
