ԱՍՈՐԻՆԵՐԻ ՑԵՂԱՍՊԱՆՈՒԹՅԱՆ ՀՈՒՇԱՐՁԱՆ ԲԵԼԳԻԱՅՈՒՄ Հ. Չ. Այդ մասին հուլիսի 20-ի հաղորդագրությամբ, որը երեկ հրապարակեց «Հայթերթ» կայքէջը, տեղեկացրել են Բելգիայի ասորական ինստիտուտն ու «Սեյֆո» կենտրոնը: Հաղորդագրությունը տարածվել է Լիեժ քաղաքից: Ահա թե ինչ է ասված. «Եվրոպայի կենտրոնում կանգնեցվում է ասորիների ցեղասպանությանՙ Սեյֆոյի եւս մեկ հուշարձան: Մինչ այդ համանման հուշարձաններ կանգնեցվել էին Ավստրալիայում, Ամերիկայում, Հայաստանում եւ Ֆրանսիայում: Հուշարձանի կառուցումն իրականացվել է Բելգիայի ասորական ինստիտուտի ու «Սեյֆո» կենտրոնի համատեղ նախաձեռնությամբ: «Սեյֆո» բառը ասորերենում նշանակում է «սուր» եւ խորհրդանշում է 1915-ին Օսմանյան Թուրքիայում քրիստոնյա ասորիների, հայերի եւ պոնտացի հույների դեմ իրագործված ցեղասպանությունները: Ասորիների ցեղասպանության հուշարձանը կկանգնեցվի Բելգիայի Լիեժ քաղաքի հռչակավոր Բանյո Սանկտուերին այգում, որն այցելում է տարեկան ավելի քան 1 միլիոն մարդ: Հուշարձանի բացման արարողությունը տեղի կունենա օգոստոսի 4-ին»: | 
