ՊԱՏՎԱՎՈՐ ԿՈՉՈՒՄ ՎԱՐԴԱՆ ԳՐԻԳՈՐՅԱՆԻՆ Հ. Ծ. Բրենդիս համալսարանի սոցիալական քաղաքականության եւ կառավարման «Հելլեր սքուլի» ավարտական հանդիսության ժամանակ Նյու Յորքի Կարնեգի կորպորացիայի նախագահ Վարդան Գրիգորյանին շնորհվել է պատվավոր կոչում, որը նրան դասում է «բարձրագույն կրթության տեսլականի տեր մարդկանց, հումանիտար առարկաների կրքոտ ջատագովի, գիտնականի, պրոֆեսորի եւ առաջնորդի» շարքը, տեղեկացնում է «Արմինյն Միրոր-Սփեքթեյթր» շաբաթաթերթի հունիսի 29-ի համարը: Իր շնորհակալական խոսքում կրթության վաստակավոր մշակը հորդորել է ուսանողներինՙ ամեն ջանք գործադրել աշխարհն ավելի լավ վայր դարձնելու համար: Իսկ հունիսի 14-ին նա «Կարնեգի կորպորացիայում» ընդունել է «Գլոբըլ Քիդս» շահույթ չհետապնդող կրթական կազմակերպության անդամներին, որոնց նպատակն է խթանել ուսուցումը եւ արժեւորել գիտելիքըՙ որպես ապագա հաջողությունների գրավականը: Շարունակելով իր հանդիպումները սաների հետ, Գրիգորյանը մի ամբողջ օր էլ անցկացրել է Փրովիդենսում (Ռոուդ Այլենդ) գործող եւ իր անունը կրող տարրական դպրոցում: | 
