ՊԻՏԵՐ ԲԱԼԱՔՅԱՆԸՙ ԿՈԼՈՒՄԲԻԱ ՀԱՄԱԼՍԱՐԱՆՈՒՄ Հ. Ծ. «Արմինյըն միրոր-սփեքթեյթր» շաբաթաթերթի փոխանցմամբՙ մրցանակակիր գրող, «Ճակատագրի սեւ շունը», «Այրվող Տիգրիսը» եւ այլ գրքերի հեղինակ Պիտեր Բալաքյանը հրավիրվել է այս աշնանը դասավանդելու Կոլումբիա համալսարանի «Մերձավոր Արեւելքի, Հարավային Ասիայի եւ աֆրիկյան ուսումնասիրությունների» բաժանմունքում: Դասավանդման թեման է լինելու «Հայոց ցեղասպանությունը եւ ողջակիզումը»: Հիշողություն եւ ներկայացում»: Սեմինարատիպ կուրսը նախատեսված է անցկացնել հինգշաբթի օրերը կեսօրից հետո, ժամը 2-4-ը: Գրողը անդրադառնալու է մարդկանց վրա ցեղասպանության ազդեցությանը եւ դրա ներկայացմանը գրականության, կինոյի եւ տեսաֆիլմերի ասպարեզում: Օգտագործվելու են ինչպես փաստագրական ֆիլմեր, այնպես էլ բանաստեղծություններ, ականատեսների հիշողություններ: Համալսարանի «Հրավիրված դասախոսների» ծրագիրը հնարավոր է դարձել շնորհիվ վաղամեռիկ դոկտ. Նիկիտ եւ տիկին Էլեանոր Օրջանյանների առատաձեռն նվիրատվության 1998 թվականին: Բալաքյանից առաջ հրավիրված դասախոսների շարքում եղել են Լեւոն Աբրահամյանը, Վարդան Ազատյանը, Ջորջ Բուրնությանը, Սեդա Դադոյանը, Ռեյչլ Կոշկարյանը, Խաչիկ Թոլոլյանը եւ ուրիշներ: |
