ՀԱՅ ԾԱՆՐՈՐԴՆԵՐԻՑ ԵՐԿՈՒՍԸ ԵՎՐՈՊԱՅԻ ՉԵՄՊԻՈՆ ՀՌՉԱԿՎԵՑԻՆ Կլայպեդայում ավարտված ծանրամարտի Եվրոպայի պատանեկան առաջնությունում հիանալի ելույթներ ունեցան հայ պատանի ծանրորդները, որոնցից 9 դարձան մրցանակակիրներ: Նրանցից 2-ըՙ Սարգիս Կիրակոսյանը (85 կգ) եւ Սիմոն Մարտիրոսյանը (94 կգ-ից բարձր) դարձան Եվրոպայի չեմպիոններ մինչեւ 17 տարեկանների մրցաշարում: Մինչեւ 85 կգ քաշային կարգում չեմպիոնի տիտղոսի համար հիմնական պայքարն ընթացավ Սարգիս Կիրակոսյանի եւ Արսեն Մարտիրոսյանի միջեւ: Այդ պայքարում ուժեղագույնը ճանաչվեց Սարգիս Կիրակոսյանը, որը հստակ կատարելով բոլոր 6 փորձերն էլ, երկամարտի 249 կգ (109+140) արդյունքով հռչակվեց Եվրոպայի չեմպիոն: Արսեն Մարտիրոսյանը 242 կգ (108+134) արդյունքով դարձավ արծաթե մեդալակիրՙ 2-րդ մրցանակակիր դառնալով նաեւ առանձին վարժություններում: Բրոնզե մեդալը նվաճեց իտալացի Մաթեո Կուռկուռուտոնՙ 223 կգ (101+122): 94 կգ-ից բարձր անձնական քաշ ունեցող ծանրորդների մրցավեճում վստահ ելույթ ունեցավ Սիմոն Մարտիրոսյանըՙ ոսկե մեդալ նվաճելով ինչպես երկամարտում, այնպես էլ առանձին վարժություններում: Երկամարտի նրա արդյունքըՙ 367 կգ (167+200) 42 կգ-ով գերազանցում է ռուսաստանցի Յուրի Ախմեդիանովի ցուցանիշը, որը գրավեց 2-րդ տեղը: Բրոնզե մեդալակիր, ռումինացի Միրչեա Ռոմանը ցույց տվեց 321 կգ (145+176) արդյունք: Հայաստանի մյուս ներկայացուցիչըՙ Արեն Հարությունյանը երկամարտի 305 կգ (135+170) արդյունքով գրավեց 5-րդ տեղը: Մինչեւ 17 տարեկանների մրցաշարում 77 կգ քաշային կարգում Մանուկ Մկրտչյանը երկամարտի 285 կգ (123+162) արդյունքով դարձավ բրոնզե մեդալակիր: Մեր մյուս մասնակիցըՙ Նորայր Ավետիսյանը երկամարտի 277 կգ (122+155) արդյունքով գրավեց 6-րդ տեղը: Մինչեւ 85 կգ քաշային կարգում ծանրորդ Հովհաննես Ավդալյանին չհաջողվեց մրցանակակիր դառնալ: Նա երկամարտի 295 կգ (135+160) արդյունքով գրավեց 5-րդ տեղը: Մինչեւ 15 տարեկան աղջիկների մրցավեճում Սոնա Պողոսյանը (63 կգ) 5 ծանրորդուհիների հետ պայքարում երկամարտի 177 կգ (77+100) արդյունքով դարձավ Եվրոպայի փոխչեմպիոնուհի: Նա բրոնզե մեդալ նվաճեց պոկում վարժությունում, իսկ հրումում դարձավ արծաթե մրցանակակիր: 63 կգ-ից բարձր քաշային աղջիկների մրցապայքարում Հռիփսիմե Պողոսյանը երկամարտի 170 կգ (77+93) արդյունքով գրավեց 4-րդ տեղը: | 
