ԸՄԲԻՇՆԵՐԸ 3 ՈՍԿԵ ՄԵԴԱԼ ՊԱՐԳԵՎԵՑԻՆ ՀԱՅԱՍՏԱՆԻՆ Ֆրանսիական Նիցա քաղաքում ընթացող Ֆրանկոֆոնիայի միջազգային 7-րդ խաղերում հիանալի ելույթներ են ունենում հայ ըմբիշները, որոնք արդեն 3 ոսկե մեդալ են նվաճել: Մինչեւ 55 կգ քաշային կարգում չեմպիոն հռչակվեց Օհան Գիքինյանը, որը հաջորդաբար հաղթեց Մադագասկարի ներկայացուցիչ Բիենվենու Անդրիամալալային (4-0), լեհ Ադամ Բեյնկոզսկուն (4-0) եւ կանադացի Սթիվեն Տակահաշիին (3-1): Հայաստանին 2-րդ ոսկե մեդալը պարգեւեց մինչեւ 66 կգ քաշային կարգում հանդես եկած Նարեկ Սիրունյանը: Նա պայքարից դուրս մղեց սենեգալցի Վիկտոր Դիատային (4-0), քաթարցի Աբդուֆրահման Իբրահիմին (5-0), կանադացի Գեդրիկ Հուդսոնին (5-0) եւ ռումինացի Ադրիան Մոյեսին (3-1): Ազատոճային մեր 3-րդ ըմբիշն էլՙ Վիկտոր Կազիշվիլին հաղթելով իր բոլոր մրցակիցներին, կանգնեց պատվո պատվանդանի վերին աստիճանին: Հիշեցնենք, որ Կազիշվիլին օգոստոսին Սոֆիայում կայացած ըմբշամարտի աշխարհի երիտասարդական առաջնությունում արծաթե մեդալ էր նվաճել: Ֆրանկոֆոնիայի միջազգային մարզամշակութային խաղերն իրենց ընդգրկմամբ, նշանակությամբ աշխարհում 2-րդն են համարվում օլիմպիական խաղերից հետո եւ անցկացվում են օլիմպիադաներին նախորդող տարիներին: | 
