ԿՀՎ-Ն ՄԻՋԱԶԳԱՅԻՆ ԴՐԱՄԱԿԱՆ ՓՈԽԱՆՑՈՒՄՆԵՐԻ ՏՎՅԱԼՆԵՐ Է ՀԱՎԱՔՈՒՄ Պ. Ք. ԿՀՎ-ն սկսել է կազմել միջազգային դրամական փոխանցումների տվյալների ծավալուն բազա, որ կներառի ֆինանսական գործառնությունների հետ կապված տեղեկություններ եւ ԱՄՆ-ի միլիոնավոր քաղաքացիների անձնական տվյալներ: Այդ մասին հաղորդում է The Wall Street Journal հանդեսըՙ վկայակոչելով լավատեղյակ աղբյուրներ: Հատուկ ծրագրի շրջանակներում հետախուզական վարչությունը տվյալներ է հավաքում դրամական փոխանցումներ իրականացնող ամերիկյան ընկերություններից: ԿՀՎ-ն համագործակցում է մասնավորապես Western Union ամերիկյան ընկերության հետ: Բազայում չեն ներառվի ներքին դրամական փոխանցումներ: Հավաքվող տեղեկությունների մեծ մասը վերաբերում է արտասահմանյան փոխանցումներին, սակայն դրանց որոշ մասն անցնում է ԱՄՆ-ով: Այդ ծրագրի շրջանակներում ԿՀՎ-ն համագործակցում է ՀԴԲ-ի հետ, որին տեղեկություններ է փոխանցում երկրի ներսում ենթադրվող ահաբեկչական գործունեության վերաբերյալ: Երկու հատուկ ծառայությունները հրաժարվում են մեկնաբանել իրենց գործողությունների հետ կապված տեղեկությունները: ԿՀՎ-ն զբաղվում է արտաքին հետախուզությամբ, ուստի իրավունք չունի հետեւելու ԱՄՆ-ի քաղաքացիներին: Սակայն տվյալ դեպքում, դատելով ըստ ամենայնի, հատուկ ծառայությունն օգտվում է այն հանգամանքից, որ ինքը կարող է ԱՄՆ-ում իրականացնել արտաքին հետախուզության նպատակներին ծառայող գործողություններ: Ներկայիս ծրագրի խնդիրն է վերահսկել ֆինանսական այն հոսքերը, որոնք միտված են ամբողջ աշխարհում ահաբեկչական խմբավորումների ֆինանսավորմանը: Դրամական փոխանցումների լրտեսման ծրագրի գոյության մասին ամերիկացի օրենսդիրներն իմացան 2013-ի ամռանը: Նրանք դժգոհություն են արտահայտում ծրագրի առնչությամբ, քանի որ հատուկ գործակալները հավաքում են ոչ միայն դրամական փոխանցումներին վերաբերող տեղեկություններ, այլեւ քաղաքացիների անձնական տվյալներ, օրինակՙ սոցիալական ապահովագրության համարներ: | 
