ԱՆԴՐԵՅ ԲԱՐԱՆՈՎԸ ՀԱՆԴԵՍ ԵԿԱՎ ՀՊԵՆ-Ի ՀԵՏ Մ. Հ. Երեկ Արամ Խաչատրյան համերգասրահում տեղի ունեցավ Արամ Խաչատրյանի 110-ամյակին նվիրված միջազգային փառատոնի գալա համերգը: Համերգային ծրագրով հանդես եկան Հայաստանի պետական երիտասարդական նվագախումբը` անվանի ջութակահար Անդրեյ Բարանովի հետ: Լրագրողների հետ հանդիպմանը Հայաստանի պետական երիտասարդական նվագախմբի գեղարվեստական ղեկավար եւ գլխավոր դիրիժոր Սերգեյ Սմբատյանը նշեց, որ համերգային ծրագրում կնհչեն միմիայն Խաչատրյանի ստեղծագործությունները: Ի դեպ, այս համերգային ծրագիրը երիտասարդական նվագախումբը կատարել է նաեւ Մոսկվայում: Ի դեպ, Բարանովը կատարելու է Խաչատրյանի «Ջութակի կոնցերտը», որի երաժիշտն ստեղծագործությունն սովորել է հատուկ փառատոնին կատարելու համար: «Կոմպոզիտորի հոբելյանին նվիրված փառատոնը մեծ ոգեւորությամբ անցավ. փառատոնը նպաստեց ոչ միայն Խաչատրյանի գործերի քարոզչությանը, այլ նաեւ մենք փորձեցինք ներկայացնել նրա գործերն այլ ֆորմատով: Խոստանում ենք, որ փառատոնը կլինի ամենամյա, ինչը շատ մեծ պարտականություն է, քանի որ փառատոնը պետք է ամուր հիմք ունենա, որպեսզի շարունակություն էլ ունենա»,-ասաց Սմբատյանը: Խոսելով Բարանովի մասին` Սմբատյանն ասաց, որ իրենք արդեն համագործակցել են. նոյեմբերի 24-ին, ՀՊԵՆ-ը Բարանովի հետ Մոսկվայի կոնսերվատորիայի Մեծ դահլիճում համատեղ համերգով է հանդես եկել: Բարանովը երաժշտական աշխարհ է մտնել նախքան... ծնվելը, քանի որ, ինչպես ասաց երաժիշտը, ծնվել է երաժիշտների ընտանիքում. «Երախտապարտ եմ ծնողներիս, որ լավագույն երաժիշտների միջոցով ինձ սովորեցրել են հասկանալ եւ սիրել դասական երաժշտություն: Ինձ համար ավելի հեշտ է կատարել երաժշտությունը, քան` խոսել դրա մասին», եւ ավելացրեց. «Ես վաղուց էի երազում Խաչատրյան կատարել եւ ահա այսօր ինձ տրվել է այդ առիթը: Կարծում եմ` այդ ստեղծագործությունը կմտնի իմ երգացանկ, քանի որ Խաչատրյանը բացառիկ կոմպոզիտոր է»: Ի դեպ, Բարանովը 2012-ին մասնակցել է Եղիսաբեթ թագուհու անվան մրցույթին եւ հաղթելով` ստացել է Ստրադիվարիուսի «Հագինս» ջութակը: | 
