ԽԱՉՔԱՐՙ ՎԱԼԱՆՍԻ «ԻՋԵՎԱՆ» ՀՐԱՊԱՐԱԿՈՒՄ 2015թ. ապրիլի 19-ին, Հայոց ցեղասպանության 100-րդ տարելիցին ընդառաջՙ Ֆրանսիայի Վալանս քաղաքի «Իջեւան» հրապարակում տեղի ունեցավ խաչքարի հանդիսավոր բացում: Խաչքարը Ջուղայի խաչքարի կրկնօրինակն էՙ կերտված հայկական տուֆից: Մանկական երգչախմբի կողմից կատարվեցին Ֆրանսիայի եւ Հայաստանի օրհներգերը: Բացման հանդիսավոր արարողությունը մեկնարկեց Ամենայն Հայոց կաթողիկոս Գարեգին Բ-ի օրհնության գրի ընթերցմամբ: Ելույթներով հանդես եկան Վալանսի քաղաքապետ Նիկոլա Դարագոնը, Լիոնում ՀՀ գլխավոր հյուպատոսության 1-ին քարտուղար, փոխհյուպատոս Վաներ Հարությունյանը, միջոցառման նախաձեռնողներՙ Ուրֆահայերի միության նախագահ Ժորժ Ռաստկլանը, Ֆրանս-Աշտարակ-Արմենի միության նախագահ Լեւոն Չատիկյանը: Խաչքարի տեղադրման նախաձեռնությունն իրականացվել է նաեւ բարերարներ Կարեն Կակոյանի եւ Արմեն Շահազիզյանի գործուն աջակցությամբ: Բացման հանդիսավոր արարողությանը ներկա էին ավելի քան 400 հրավիրյալներ տեղական եւ տարածաշրջանային պատգամավորներ, ֆրանսահայեր, տեղական լրատվամիջոցների եւ մշակութային ոլորտի ներկայացուցիչներ: Բացման արարողության ընթացքում հայ համայնքի ներկայացուցիչները, շնորհակալություն հայտնելով Վալանսի քաղաքապետին եւ ավագանուն, ներկաներին ներկայացրին խաչքարի էությունը, նշանակությունը եւ խորհուրդը հայ ժողովրդի համար: Լիոնում ՀՀ գլխավոր հյուպատոսության ներկայացուցիչն իր ելույթում շնորհակալություն եւ գոհունակություն հայտնելով Վալանս քաղաքի կողմից Հայոց ցեղասպանության 100-րդ տարելիցին կազմակերպվող բազմաթիվ միջոցառումների կապակցությամբ, անդրադարձավ խաչքարի եւ դրա արվեստի կարեւորությանը եւ ներկայումս վտանգված լինելու հանգամանքինՙ հիշեցնելով ներկաներին 2002-2005թթ. Նախիջեւանի Ջուղայի հայկական գերեզմանոցում մի քանի հազար խաչքարերի ոչնչացումը Ադրբեջանի կողմից խաղաղ ժամանակՙ գերեզմանոցը վերածելով ռազմական պոլիգոնի: Նաեւ Լիոնում ՀՀ գլխավոր հյուպատոսության ներկայացուցիչը Վալանսի քաղաքապետին եւ բոլոր կամզակերպիչներին փոխանցեց ՀՀ Սփյուռքի նախարար Հրանուշ Հակոբյանի շնորհակալական ուղերձըՙ խաչքարի տեղադրման եւ կատարված աշխատանքի կապակցությամբ: Այնուհետեւ Վալանսի քաղաքապետ Նիկոլա Դարագոնը իր ելույթումՙ անդրադառնալով Հայոց ցեղասպանության 100-րդ տարելիցի խորհրդին եւ կարեւորությանը, գոհունակությամբ նշեց, որ սա Վալանս քաղաքի հանրային հատվածի առաջին խաչքարն է եւ եւս մեկ խոսուն ապացույց է հայ-ֆրանսիական ամուր կապերի, Վալանսի աշխույժ հայ համայնքի կարեւորության: Քաղաքապետն ընդգծեց նաեւ քույր քաղաք Իջեւանի հետ կապերի հետագա զարգացման կարեւորությունը: Բացման արարողությունից հետո միջոցառման մասնակիցները հրավիրվեցին Վալանսի քաղապետարանում կազմակերպված ընդունելությանը: | 
