ԲՈԼՈՆԻԱՆ` ԵՐԵՎԱՆՈՒՄ Է, ՈՐՏԵՂ ԲԵԼԱՌՈՒՍԸ ՄԵՐ ՑԱՎԸ ՏԱՆՈՒՄ Է Հ. ԱՖՅԱՆ Եթե իսլանդերենից բառացիորեն թարգմանենք «կրթություն» բառը, ապա կստացվի` «լավ մարդ դառնալ»: Այս մասին մայիսի 14-15-ը Երեւանում ընթացող Բոլոնիայի նախագահական գագաթաժողովում հայտարարեց Իսլանդիայի ԿԳ նախարարը: Հիշեցնենք, որ մեր երկիրը նախագահում է Բոլոնիայի գործընթացում, եւ հենց Հայաստանի նախագահության օրոք տեղի ունեցավ Բոլոնիայի ընտանիքի երկար սպասված համալրումը: Բելառուսը վերջապես դարձավ գործընթացի մաս, չնայած Նորվեգիան երկար ժամանակ դեմ էր հանդես գալիս ԱՊՀ այս երկրի ներգրավմանը իրենց ընտանիք: Այս կապակցությամբ լրագորղների հետ զրույցում Բելառուսի ԿԳ նախարար Նատալյա Բարանովան նշել է, որ իրենք ուրախ են երկար սպասված իրադարձության կապակցությամբ: Երեւանյան գագաթաժողովի արդյունքում այսօր կընդունվի նաեւ կոմյունիկե: Համատեղ այս փաստաթղթից գործընթացին մասնակից գրեթե բոլոր երկրները միայն գոհ են: Օրինակ Լեհաստանի ներկայացուցիչը նշել է, որ երեւանյան կոմյունիկեն մինչեւ այժմ ընդունված բոլոր կոմյունիկեներից ամենալավն է: Կիպրոսի ներկայացուցիչը նշել է, որ այնտեղ ներառված են իրենց բոլոր ցանկությունները: Գոհ է նաեւ Բելգիայի ներկայացուցիչը, ով նշել է, որ երեւանյան կոմյունիկեն արտահայտում է իրենց բոլորի տեսլականը` կրթության ոլորտում, միեւնույն ժամանակ ընդգծել, որ շատ կարեւոր է, որպեսզի կոմյունիկեում արտահայտված գործընթացները չմնան թղթի վրա: Ըստ երեւանյան փաստաթղթի` նախատեսվում է մասնավորաբար բարձրագույն կրթությունը դարձնել ներառական...Կոմյունիկեի վերջնական տեսքը կհաստատվի միայն այսօր: Գագաթաժողովին մասնակցել է նաեւ ՀՀ նախագահը: Սերժ Սարգսյանը, ողջունելով հյուրերին նշել է. «Կրթությունը ինքնանպատակ չէ, այն կոչված է ծառայելու համամարդկային արժեքներին ու նպատակներին: Այսօր 21-րդ դարի քաղաքակիրթ աշխարհում դեռեւս ականատես ենք բազմաթիվ ահաբեկչական գործողութոյւնների, բռնությունների, պատերազմների: Մարդկային բանականության եւ արժեհամակարգի տկարությունը անխուսափելի է դարձնում նման անընդունելի դրսեւորումները: Հետեւաբար` հոգեւոր, գիտական, մշակութային բովանդակության վրա հիմնված կրթությունը պետք է միտված լինի մարդկային ռեսուրսի բնականոն զարգացմանը` ամենալայն համատեքստում»: Նախագահը նաեւ նշել է, որ կրթությունը մշտապես առանձնահատուկ ակնածանքի է արժանացել հայ ժողովրդի կողմից: ...Դե իսկ «ընտանիքի» նոր անդամ Բելառուսի ԿԳ նախարար Նատալյա Բարանովան, լրագրողների բոլոր հարցերին պատասխանելուց հետո, ասել է. «Վե՞րջ, հարցերն ավարտվեցի՞ն, դե թույլ տվեք հիմա ասել այն, ինչը ուզում եմ` բոլոր հայերի ցավը տանեմ: Դուք շատ յուրահատուկ լեզու ունեք, հայերենի հնչողությունը նման չէ ոչ մի լեզվի»: | 
