ԲԱՐԻ ԼՈՒՐ Հայաստանի գրողների միության երջանկահիշատակ նախագահ Լեւոն Անանյանը 2 տարի առաջ բարձրաձայնեց, որ Հովհաննես Թումանյանի Թբիլիսիի բնակարանի ճակատագիրն անորոշ է ու առավել հավանական, որ այն անդառնալիորեն կկորցնենք: Վրաց կառավարությունը բանաստեղծի բնակարանը, որի մեծ մասը քաղաքային գրադարանի էր վերածվել, օտարել ու պարտքի դիմաց հանձնել էր վրացի մի գործարարի: Նա էլ որոշել էր իր սեփականությունը վաճառել: Հայաստանում ոտք ու ձեռք ընկան, շատ դռներ թակեցին, վերջը Գյումրու քաղաքապետ Վարդան Ղուկասյանը հանձն առավ Թումանյանի բնակարանը գնել: Սակայն բնակարանի մյուս` բնակելի հատվածում, շարունակում էր ապրել Թումանյանի ծոռնուհին` Ալյոնա Կալեսնիկովա-Թումանյանը: Հայաստանի գրողների միության ղեկավարությունը բարի լուրով է վերադարձել Թբիլիսիից: Սուրբ Գեւորգ եկեղեցու հիմնադրամը 65 հազար դոլարով Ալյոնա Կալեսնիկովա-Թումանյանի համար բնակարան է գնել Թբիլիսիում, որի դիմաց էլ ծոռնուհին իր մեծ պապի բնակարանի` իրեն հասանելիք մասը հանձնել է վիրահայոց թեմին: Հովհաննես Թումանյանի` Ամաղլեբիս 18 հասցեի բնակարանն ամբողջովին ձեռք է բերված ու շուտով կդառնա թումանյանական «Վերնատուն»: | 
