ՕՐԵՅԴԻՍ ՄԱՍԵՈՅԻ ՆԿԱՐՆԵՐԻ ՑՈՒՑԱՀԱՆԴԵՍԻ ԲԱՑՈՒՄԸ ԱՅՍՕՐՙ ԿԱԼԻՖՈՌՆԻԱՅՈՒՄ Հ. Ծ. «Աշխարհը փոխվում է եւ այրված հին կամուրջները վերականգնվում են, կարծում ենք, որ մեզ շրջապատող աշխարհի գոյության ներդաշնակությունը պահպանելու ամենամեծ դերը վերապահված է արվեստի ուժին: Արվեստն է մեծագույն դեսպանը, որ մերձեցնում է մարդկանց եւ երկրների: Արվեստի գործեր հավաքելն էլ ազնվագույն հաճույքն է», գրում է մեր ընթերցողներին ծանոթ արվեստաբան, բանաստեղծուհի Թամարա Հովհաննիսյանը Կալիֆոռնիայից եւ տեղեկացնում, որ իր եւ ամուսնուՙ Մայքլ Աղասիի Կարմել քաղաքի սեփական պատկերասրահումՙ այսօր, սեպտեմբերի 4-ին կայանալու է կուբացի նկարիչ Օրեյդիս Մասեոյի նկարների ցուցահանդեսի բացումը: Օրեյդիս Մասեոն (Oreydis Maceo) տեսողական արվեստի եւ կուրատորական աշխատանքների ճանաչված մասնագետ է: Ծնվել է Սանտյագոյում (Կուբա): Ակադեմիական կրթությունը ստացել է տեղի Խոսե Հոակին Տեխադո պլաստիկ արվեստի հաստատությունում: Բազմաժանր արվեստագետ է, որն այժմ ապրում է Սան Ֆրանցիսկոյում (Կալիֆոռնիա, ԱՄՆ) եւ համագործակցում «Քենդլ լայթ լոբըլ Ամերիկայի» (Candle Light Global American) հետ, որտեղ հիմնադիրներից մեկն է եւ տնօրենը «Արտադրության եւ կուրատորական աշխատանքների» բաժնի: Արժանացել է բազմաթիվ մրցանակների: |
