ՍՏԵՓԱՆԱԿԵՐՏԸ ՊԱՏՐԱՍՏ Է, ՕԴԱՆԱՎԱԿԱՅԱՆԸ` ՆՈՒՅՆՊԵՍ ՀՈՎԻԿ ԱՖՅԱՆ ԼՂՀ նախագահ Բակո Սահակյանը REGNUM գործակալության մոսկովյան գրասենյակի կազմակերպած մամուլի ասուլիսի ժամանակ հայտարարել է, որ «Արցախը պատրաստ է միջազգային ահաբեկչության դեմ պայքարին»: Այս համատեքստում, Բակո Սահակյանը հատկապես կարեւորել է Ստեփանակերտի օդանավակայանի գործոնը, որն, ըստ ԼՂՀ ղեկավարի, «կարող է օգտագործվել ռուսական զինուժի կողմից` Սիրիայում հակաակաբեկչական գործողությունների ժամանակ»: Արցախի նախագահը նշել է, որ օդանավակայանի շահագործումից հետո «Ստեփանակերտը պատրաստ է ռուսական կողմի հետ քննարկել հնարավոր համագործակցության հարցը»: Ռուսական կողմն այս հայտարարությանը դեռ չի արձագանքել, չնայած` չի բացառվում, որ նախագահ Սահակյանի այս հայտարարությունն էր` նախարար Լավրովի երեւանյան այցի արձագանքը: Փոխարենը ՌԴ նախագահ Պուտինը հանձնարարել է պատրաստել Հայաստանի տարածքում հայ-ռուսական համատեղ հակաօդային պաշտպանության կայան ստեղծելու երկկողմ համաձայնագիրը: |
