ԳՎԱՏԵՄԱԼԱՅԻ ԿՈՆԳՐԵՍԸ ԴԱՏԱՊԱՐՏԵԼ Է ՀԱՅԱՍՏԱՆԻ «ԱԳՐԵՍԻԱՆ» ԱՆԱՀԻՏ ՀՈՎՍԵՓՅԱՆ, Գերմանիա Վերջերս Գվատեմալայի Կոնգրեսը ձայների մեծամասնությամբ ընդունել է Ադրբեջանի հանդեպ Հայաստանի «ագրեսիայի» մասին բանաձեւ, որը դատապարտում է հայկական զինուժի կողմից Ադրբեջանի «անկախ տարածքի զավթումը», տեղեկացնում է Ազերթաջըՙ հղում անելով սեփական երկրի արտգործնախարարության մամուլի ծառայությանը: Ըստ նույն աղբյուրի, բանաձեւը դատապարտել է նաեւ 1992-ի փետրվարի 26-ին «Խոջալուում խաղաղ բնակչության նկատմամբ իրագործված ցեղասպանությունը»: Գվատեմալայի Կոնգրեսի նախագահ Լուիս Ռաբբեն Մեքսիկայում Ադրբեջանի դեսպան Մուխթարովի հետ հանդիպմանն ընդգծել է, թե բանաձեւը նպաստելու է Գվատեմալա-Ադրբեջան կապերի հզորացմանը: Ադրբեջանը Հայաստանի նման Գվատեմալայում դեսպանություն չունի, Մեքսիկայում հաստատված դեսպաններն են համակարգում Գվատեմալայի հետ կապերը: Մեքսիկայում ՀՀ դեսպանության հետ հեռախոսակապ հաստատելու մեր բազմաթիվ փորձերն առայժմ ապարդյուն են: Ակնհայտորեն, դարձյալ գործ ունենք միջպետական կաշառակերության եւս մի ցայտուն օրինակի հետ: Այլապես ինչո՞վ բացատրել մեր տարածաշրջանում ոչ մի շահ կամ շահագրգռություն չունեցող Գվատեմալայի նման մի երկրի ջե՜րմ հոգատարությունը Ադրբեջանի նկատմամբ: | 
